Hatutan.com, (04 Dezembru 2023), Díli—Ministru Interior (MI), Francisco da Costa Guterres simu ona lista membru Polísia Nasionál Timor-Leste (PNTL) na’in 1.000-resin ne’ebé involve iha Grupu Arte Marsiál (GAM) no Grupu Arte Rituál (GAR), atu bele tuir juramentu iha 07 Dezembru tinan ne’e, iha Palásiu Governu-Díli.

Ministru Interior, Francisco da Costa Guterres. Foto: Tome da Silva.

“Ha’u simu ona lista provizóriu 1.300-resin. Iha dia 07 Dezembru lokraik sira halo juramentu iha Palásiu Governu,” Francisco Guterres hateten hafoin partisipa semináriu internasionál kona-bá dezastre nian iha Suai Room, Timor Plaza, Díli, Segunda (04/12/2023).

Lee Mós: Opsaun Rua bá Membru F-FDTL 500-resin Ne’ebé Identifikadu Involve GAM-GAR  

Governante ne’e fó razaun katak, foin lalais membru sira la konsge halo juramentu iha serimónia aniversáriu Proklamasaun Independénsia Unilaterál RDTL, 28 Novembru 2023, tanba povu Timor-Leste tomak hasoru kedan loron importante rua, ida mak loron istóriku no ida seluk maka posse bá xefe suku foun sira, iha ne’ebé membru Governu sira barak mak destaka hotu bá munisípiu no postu administrativu sira.

Hatán kona-bá karik iha serimónia juramentu ne’e membru sira entrega mós sira nia atributu GAM-GAR ne’ebé mak durante ne’e sira utiliza hosi tuir treinu, Francisco Guterres dehan, Governu kria ona ekipa komisaun organizadora ida ne’ebé involve hosi instituisaun PNTL ho F-FDTL atu haree assuntu ne’e.

Iha ne’ebá, sei husu membru sira ne’e ida-idak, hakarak serbí grupu artes marsiais ka serbí loos de’it instuisaun seguransa no defeza.

Bainhira deside ona atu sai hosi GAM-GAR, tenke halo deklarasaun no jura bá Bandeira lulik Repúblika Demokrátika Timor-Leste (RDTL).

“Sé o hakarak polisia, entaun tenke husik hela atributu hotu no sai hosi artes marsiais. Ó jura bá Bandeira RDTL para serví neutru. Ida-ne’e mak ita hakarak. Sira iha munisipiu mós mai hotu,” Francisco Guterres subliña.

Bá oin Governu sei kontinua halo kontrolu bá membru PNTL sira ne’ebé involve iha artes masriais no rituais, bainhira identifika haruka sira priénxe deklasaun no sai ‘kedan’ hosi Polisia.

Jornalista: Rogério Pereira Cárceres