Hatutan.com, (09 Dezembru 2023), Atlanta– Gabinete Nasoins Unidas nian kona-bá droga no krime ka United Nations Office on Drugs and Crime (UNODC, sigla Inglês) organiza simpóziu akadémiku internasionál iha área Edukasaun no liuliu kona-bá peskiza anti korrupsaun.

Lee Mós: Sosiedade Sivil Kontra Subsidiu bá Deputadu sira

Ministru Estranjeiru Estadu Unidus Amérika Antony Blinken foto ho pemiadu na’in-11 2023 Anti-Corruption Champions Award iha Washington DC, Kinta (07/12/2023). Foto/Espesiál

UNODC tradisionalmente organiza ona simpóziu akadémiku internasionál sira antes Konferénsia Estadu Parte sira-nian iha Konvensaun Nasoins Unidas kontra Korrupsaun, ne’ebé hala’o kada tinan rua.  

Jornalista Hatutan.com, Francisco Belo Simões nu’udár manan na’in premiu 2023 Anti-Corruption Champions Award  sei partisipa mós eventu internasionál ne’e.

Komunikadu imprensa ne’ebé Hatutan.com asesu Sábadu (09/12/2023), relata katak durante tinan hirak-ne’e, simpóziu sira-ne’e sai hanesan eventu bandeira ne’ebé hatudu programa akadémiku no edukasaun UNODC nian, envolvimentu UNODC nian ho akadémiku no parte interesada la’ós estadu sira seluk.

Eventu sira-ne’e oferese forum ida bá membru rede akadémiku UNODC nian, akadémiku no peritu sira atu troka koñesimentu no prátika di’ak sira iha área edukasaun no peskiza anti korrupsaun nian no aprezenta sira-nia hanoin iha konferénsia.

Iha simpóziu tolu dahuluk (2015, 2019 no 2021) halibur parte interesada atus bá atus ne’ebé envolve iha diskusaun kona-bá tópiku oioin ne’ebé relasiona ho korrupsaun, inklui norma no regulamentu internasionál no nasionál anti korrupsaun, korrupsaun iha setór privadu, korrupsaun no jéneru, korrupsaun no teknolojia, korrupsaun iha desportu no papél akadémiku iha kombate korrupsaun.

Rekomendasaun sira husi simpóziu oin-oin ne’e aprezenta ona bá Estadu Parte sira iha UNCAC durante eventu espesiál sira, orienta dezenvolvimentu UNODC nia portafóliu edukasaun anti korrupsaun no dala barak aprezenta pontu inísiu bá dezenvolvimentu instrumentu no atividade foun sira ne’ebé ho objetivu atu avansa edukasaun no peskiza anti korrupsaun.

Tuir tradisaun ida-ne’e, sei hala’o simpóziu Akadémiku Anti Korrupsaun da-haat molok sesaun sanulu husi konferénsia (CoSP10), ne’ebé hala’o iha Atlanta husi 11 to’o 15 fulan-Dezembru 2023.

Tinan ida-ne’e, simpóziu ne’e sei harii konstrusaun bá inisiativa Global Resource for Anti-Korruption Education and Youth Empowerment (GRACE) serie diálogu rejionál ba Afrika, Azia, Europa no Amérika Latina  ne’ebé hala’o iha tinan 2023 bá akadémiku, foin-sa’e no organizasaun sosiedade sivíl sira no fahe rekomendasaun sira ne’ebé halo durante diálogu hirak-ne’e atu hasa’e atór la’ós-estadu sira-nia envolvimentu iha implementasaun Konvensaun Nasoins Unidas kontra Korrupsaun (UNCAC).

Objetivu sira bá simpóziu loron rua; Sábadu-Domingu (09-10/12/2023), ne’e sei hala’o ho apoiu husi UNODC nia inisiativa GRACE.

Objetivu hosi eventu ne’e mak fornese forum ida bá membru rede akadémiku UNODC nian, akadémiku no peritu sira seluk, nune’e mós polísia sira atu diskute tendénsia no prátika di’ak sira iha peskiza no edukasaun kona-bá anti korrupsaun.

Enkoraja peskiza liután kona-bá tópiku sira ne’ebé relasiona ho anti korrupsaun hanesan prevensaun bá prátika korrupsaun iha edukasaun, medida anti korrupsaun ne’ebé hetan ona teste iha empíriku sira hanesan, julgamentu sira ne’ebé kontrola randomizadu, sukat efikásia no impaktu husi medida anti korrupsaun iha setór oin-oin (saúde, edukasaun, dijitál).

Avaliasaun bá dezafiu no lakuna sira ne’ebé akadémiku sira hasoru bainhira halo peskiza kona-bá korrupsaun, inklui dalan sira atu halo ponte ba lakuna entre peskiza akadémiku no prátika polítika, inklui liuhusi estudu kazu moris real.

Partisipante sira iha simpóziu ne’e halibur akadémiku no peritu sira husi rede akadémika UNODC nian no mós sira ne’ebé hanorin no hala’o peskiza kona-ba tópiku anti korrupsaun iha universidade no instituisaun akadémiku sira iha mundu tomak. Ida-ne’e sei loke bá akadémiku no peskizadór sira ne’ebé iha interesse, estudante universidade, foin-sa’e sira, organizasaun sosiedade sivíl, organizasaun internasionál sira, no Estadu-Membru sira.

 Metodolojia no formatu iha simpóziu ne’e sei hala’o ho forma interativa durante loron rua nia laran. Sei foka liubá área temátika espesífiku sira no inklui sesaun plenária sira bá partisipante sira atu aprezenta no diskute estudu sira foin lalais ne’e kona-ba tópiku oioin, inklui oinsá atu sukat korrupsaun no impaktu, risku no oportunidade sira ba intelijénsia umana no teknolojia emerjente sira, nexu entre krime organizadu no korrupsaun, no seluk tan. Perspetiva jéneru, juventude no edukasaun sei inklui hanesan prioridade cross-cutting iha sesaun temátika hotu-hotu.

Ida-ne’e mós sei fó dalan bá partisipante sira atu aprende liután kona-bá esforsu UNODC nian atu hametin envolvimentu akadémiku, edukadór no autór naun-estadu sira seluk bainhira ko’alia kona-bá implementasaun UNCAC. **