Hatutan.com, (11 Dezembru 2023), Díli—Komité Eleitorál Federasaun Futeból Timor-Leste (FFTL), deklara laiha reklamasaun ruma hasoru kandidatu Prezidente ezekutivu, Francisco Kalbuadi Lay ho Nilton Gusmão, nune’e sei avansa bá kongressu extraordináriu ne’ebé sei hala’o iha loron 10 fulan-janeiru 2024.

Komité Eleitorál Federasaun Futeból Timor-Leste (FFTL), anunsia laiha reklamasaun ruma hasoru kandidatu Prezidente ezekutivu, Francisco Kalbuadi Lay ho Nilton Gusmão, no kandidatu nain rua sei avansa bá kongressu extraordináriu, Segunda (11/12/2023). Foto: Vito Salvadór.

Komité Eleitorál FFTL halo deklarasaun ofisiál ne’e perante anunsiu ofisiál bá públiku relasiona ho kandidatura Francisco Kalbuadi Lay ho Nilton Gusmão nian bá pozisaun Prezidente ezekutivu FFTL períudu 2024-2026.

Lee Mós: Francisco Kalbuadi Lay ho Nilton Gusmão Kompete iha Kongresu Estraordináriu FFTL 2024

Vise-Prezidente Komité Eleitorál FFTL, Olivio Barros hateten loos duni tuir estatutu no kódigu eleitorál FFTL nian, kandidatu sira ne’ebé submete ona kandidatura atu mai konkorre bá pozisaun Prezidente ezekutivu FFTL ka Komité Ezekutivu (Exco) FFTL ne’e, hafoin komisaun eleitorál verifika dokumentus, Komité Eleitorál iha prazu loron tolu atu fó bá assosiasaun membru sira, karik iha reklamasaun, maibé to’o prazu ne’e hotu laiha assosiasaun ida mak hato’o sira nia reklamasaun bá iha kandidatura rua ne’ebé sei kompete iha kongressu extraordináriu FFTL 2024.

“Hosi parte sira ne’ebé karik la konkorda ho kandidatura sira ne’e iha, bele halo reklamasaun bainhira  sira aprezenta kandidatura mai iha Komité Eleitorál. Maibé, hosi kazu ne’e situasaun ita nian foin lalais, depois de ita halo anunisu atu simu inskrisaun ba kandidatura sira ne’ebé mak atu konkorre iha pozisaun sira bá Prezidente ezekutivu FFTL no Komité Exco iha períudu loron tolu ne’ebé ita fó bá iha entidade sira liu-liu assosiasaun sira, karik iha reklamasaun ruma maibé ita la rejista ate prazu termina,” Vise-Prezidente Komité Eleitorál FFTL, Olivio Barros hateten iha edifísiu FFTL Bairru Grilos, Segunda (11/12/2023).

Prezidente Komité Eleitorál FFTL, Queribin Jong Ferreira hateten, ohin FFTL liu hosi komité Eleitorál halo anunsia ofisiál  bá lista kandidatura Prezidente no membru ezekutivu, bazeia bá verifikasaun ne’ebé mak hala’o hosi komite eleitotál bá submisaun kandidatura bá kargu Prezidente no membru komité ezekutivu ho rezultadu maka Kandidatura bá kargu Prezidente ezekutivu FFTL, kandidatu Francisco Kalbuadi Lay passa no segundu Nilton Telmo Gusmão dos Santos mós rezultadu passa.

Ba membru ezekutivu ne’ebé kompostu hosi kandidatu  na’in-tolu mak hanesan Augusto Henrique Passa, Cosme Sarmento la pasa no ikus liu mak Domingos Goveia Moniz passa.

“Nune’e, komité eleitotál deside primeiru kandidatura bá kargu Prezidente FFTL maka Francisco Kalbuadi Lay no Nilton Gusmão dos Santos ho kandidatura bá kargu ezekutivu mak Agusto Henrique no Domingos Goveia Moiz,” Queribin Jong Ferreira anunsia.

Kongresu Extraordináriu FFTL nian bá dala-IX  sei realiza iha loron 10 fulan-janeiru tinan 2024.

Jornalista: Vito Salvadór