Hatutan.com, (20 Dezembru 2023), Díli– Tribunál Judisiál Primeira Instánsia Díli (TJPID), Kuarta (20/12/2023), kontinua halo julgamentu bá  kazu José Bernardo Soares nia mate iha sela detensaun Polísia Munisípiu Díli, 01 fulan-Setembru 2022.

Lee Mós: Família Matebian José Bernardo Ezije PCIC Fó-Sai Rezultadu Investigasaun

Iha kontinuasaun julgamentu ne’ebé prezide hosi Juiz koletivu, Jumiati Freitas, Alvaro Freitas, ho José Gutteres ne’e rona deklarasaun arguidu ho inisiál AAM.

Matebian José Bernardo Soares. Foto/Ilustrasaun

Arguidu AAM aprezenta hosi Ministériu Públiku  bazeia bá faktu númeru 14 ne’ebé Ministériu Públiku (MP) akuza ba arguidu iha koñesimentu bá matebian José Bernardo Soares nia mate iha sela-laran ho tali kesi iha kakorok.

Arguidu AAM hatán bá  juiz sira katak nia laiha koñesimentu bá matebian José Bernardo Soares nia mate iha sela ho tali, tanbá iha loron 01 fulan-Setembru 2022, hafoin matebian hetan detensaun iha sela, maizumenus tuku 6.00.otl, arguidu bá hariis iha nia uma.

“Ha’u lahatene, tanbá loraik tuku 6.00 Otl, ha’u ba hariis iha uma, hafoin matebian mate maka ha’u simu informasaun maizumenus  tuku 6-7 kalan, husi Komandante José Mariano, nia informa katak, Vitima mate ona tara-aan ho tali,” Arguidu AAM haktuir.

Argidu konta kronolojia katak, iha loron 31 fulan-Agostu 2022, denunsiana Verdiana, hato’o keixa bá arguidu iha eskuadra Caicoli, tanba nia alin kanek todan no baixa hela iha Hospital, tanba hetan baku husi matebian.

Hafoin ida ne’e, arguidu AAM hanesan ajente Polísia Investigasaun direitamente husu autorizasaun bá Komandante Polísia Investigasaun, Daniel da Costa Freitas, atu halo identifikasaun bá vitima José Bernardo Soares iha nia rezidénsia.

“Ami hetan autorizasaun husi Komandu, tanbá ne’e ho karreta Patrolia  to’o vitima nia uma, hasoru uluk vitima nia mama Regina de Jesus Sores, ami esplika hotu saída maka akontese, vitima nia ama rasik maka bolu vitima iha uma-laran sai mai, ami direitamente lori vitima akompaña husi nia mama ba eskuadra PNTL Caicoli,” nia haktuir.

Depois arguidu AAM ho nia maluk TG no TDC halo identifikasaun hotu hafoin hetan rekoñesimentu aumesmu hetan kedas autorizasaun hosi Komandante Polísia Investigasaun, Daniel da Costa Freitas, atu halo detensaun sela bá vitima, durante oras  24 nia laran  ho intensaun asegura vitima atu labele hamosu tan krime ruma. Nune’e arguidu deklara, hafoin hatama vitima bá sela, entrega ona kompeténsia ba Polísia Tomas Belo, ne’ebé turnu hodi hein sela.   

Arguidu deklara tan katak, bainhira rona tiha informasaun hosi Komandante José Mariano, nia  direitamente bá iha Komandu Munisípiu Dili, hafoin to’o ema barak maka iha ona resintu PNTL Caicoli, Díli, no arguidu atu tama bá sela laran, maibé Polísia sira ne’ebé responsavel ba sela, liu-liu Polísia Tomas Belo ne’ebé turnu, la autoriza arguidu atu tama bá sela laran.

Arguidu mós hato’o katak, nia parte la hatene saída de’it maka iha sela laran ne’e, liu-liu hanesan tali ne’ebé kesi iha vitima nia kakorok, tanba la hetan autorizasaun husi polísia sira ne’ebé hein sela ne’e rasik.

Rona tiha arguidu AAM nia deklarasaun, Juis koletivu deside, extende julgamentu no kontinua rona arguidu TDC iha loron 17 fulan-Janeiru 2024, iha oras tuku 10.00 Otl.

Iha julgamentu ne’e Ministériu Públiku reprezenta husi Prokuradór, Adérito Tilman, arguidu hetan defeza husi Defensor Públiku, Estaque Guterres.

Jornalista: Gloria Maia