Hatutan.com, (02 Fevereiru 2022), Dili—Inspetór Gabinete Inspesaun Ministériu Asuntu Parlamentár no Komunikasaun Sosiál  (MAPKOMS), Orlando da Conceição, informa katak to’o agora Gabinete Inspesaun MAPKOMS seidauk simu informasaun kona-bá irregularidade iha projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P) nian.

Notísia iha Relasaun : Deskonfia, MAPKOMS Nu’udar Prezidente FFTL Fó Projetu iha RTTL,E.P Ba Sekretaria FFTL

Inspetór Gabinete Inspesaun Ministériu Asuntu Parlamentár no Komunikasaun Sosiál (MAPKOMS), Orlando da Conceição. Foto/DNDI

Orlando da Conceição ba Hatutan.com iha nia servisu fatin iha Palaçio do Governo, Kuarta (02/02/2022), esplika katak Gabinete Inspesaun MAPKOMS nia papél mak atu halo akompañamentu, inspesaun, auditoria no fiskalizasaun ba servisu hotu MAPKOMS nian tenke kumprimenta ba lei no regulamentu sira nu’udar mata-dalan ba hotu-hotu atu hala’o serbisu.

“Ha’u seidauk iha informasaun kona-ba irregularidade iha projetu instalasaun Set-top Box RTTL,E.P . Ein-prinsípiu, ha’u hakarak informa ba ita-boot katak kona-bá projetu dijitalizasaun ba RTTL,E.P mai nanis husi Governu sira anterior ka Governu sira uluk, atu dehan katak dezde kedas iha V Governu, VI Governu, VII Governu to’o mai VIII Governu  formaliza. Iha ne’ebé projetu sira ne’e kooperasaun entre Governu Xina ho Governu Timor-Leste (GtoG/Government to Goverment),” Orlando da Conceição esklarese.

Buat ne’ebé Orlando da Conceição hatene iha projetu ne’e Governu Xina oferese material sofistikadu sira liga ho dijitalizasaun RTTL,E.P inklui fornese mós Set-top Box ho nia kuantidade 30,000 no kompañia ida ne’ebé mak dedikadu ba halo instalasaun projetu Set-top Box RTTL,E.P ne’e (DILI ENTERNAL INNOVATION INFORMATION, Lda) mai kedas husi rekomendasaun iha akordu bilateral Governu Xina ho Governu Timor-Leste.

“Karik ita-boot sira haree instalasaun iha Liquiça no instalasaun iha Maubara husi empreza ne’e mai husi parte integradu ida ho akordu kooperasaun ne’e,” Orlando da Conceição haktuir tan.

Notísia iha Relasaun: CAC Investiga Hela Instalasaun Set-top Box RTTL, E.P Ne’ebé Nakfilak Projetu “Fahe” De’it

Nia subliña tan katak, nia  la iha koñesimentu ruma kona-bá irregularidade ruma kona-bá projetu ne’e no tuir nia, se iha irregularidade ruma karik, Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo hatún despaixu mai depois Gabinete Inspesaun halo inspesaun no fiskalizasaun depois aprezenta fali rekomendasaun prosesu sira-ne’e ba ministériu atu haree.

“Karik iha irregularidade no inkomprimentu ba lei ruma, ami nia servisu tulun ministru atu haree ba sasán sira-ne’e,” nia hateten tan.

Nia esplika mós katak Lei Aprovizionamentu mós loke hela dalan ba prosesu adjudikasaun direta ba servisu espesífiku ruma.

“Ha’u adianta informasaun uluk katak empreza ne’ebé hetan projetu instalasaun ne’e parte integrante husi akordu kooperasaun Governu Xina ho Timor-Leste nian, no karik servisu instalasaun ne’e empreza ka kompañia seluk la bele halo, bele mós halo adjudikasaun direta.”

Hatán kona-ba projetu ne’e iha konflitu interese tanba MAPKOMS nu’udar mós prezidente Federasaun Futeból Timor Leste (FFTL) halo fali adjudikasaun direta ba nia Sekretaria iha FFTL, Orlando da Conceição, hateten nia laiha informasaun kona-bá ida-ne’e.

Notísia iha Relasaun: AJAR Husu CAC ho MP Sériu Investiga Projetu Set-top Box RTTL,E.P

“Karik ita-boot sira mak hatene, mas ha’u la iha informasaun kona-ba ida ne’e. Ami nia servisu atu haree no akompaña servisu hotu iha MAPKOMS atu kumprimenta ba lei. Karik iha irregularidade ruma, ami simu despaixu husi Ministru ka superiór ministériu nian atu loke prosesu inspesaun interna no fó rekomendasaun no karik iha indikasaun krime bele instaura nia kontinuasaun,” Orlando da Conceição friza tan.

Gabinete Inspesaun Internu nia servisu, tuir nia, karik bainhira hetan orientasaun no despaixu husi superiór no ierarkia atu haree sasán sira ne’e tanba  Gabinete Inspesaun Interna MAPKOMS nia servisu atu tulun ministru atu halo nia papél hodi kumprimenta ba lei no regulamentu sira.

“Iha tinan kotuk ami halo ona inspesaun interna no karik iha irregularidade ruma, maka tuir kompeténsia ne’ebé mak atribui  no karik iha irregularidade ruma ami halo rekomendasaun no halo instaurasaun ba irregularidade sira ne’e.”

Daudaun ne’e Gabinete Inspesaun MAPKOMS prepara hela atividade sira ne’ebé atu halo iha 2022 liga ho oinsá atu halo inspesaun no fiskalizasaun, atu nune’e,’ karik iha irregularidade maka sei husu autorizasaun Ministru nian atu instaura inspesaun. 

Notísia iha Relasaun: Komunidade Guisu Liquisa Konsidera Projetu Set-top Box RTTL,E.P “Laiha Benefísiu”

Gabinete Inspesaun MAPKOMS  nia servisu sei la relata ba públiku no sei instaura de’it ba ministru. Nune’e, Gabinete Inspesaun MAPKOMS  prepara hela sira-nia servisu no  konsentrasaun haree servisu ministériu tomak  nian ligadu ho atividade servisu sentrál ministériu nian no planu annual MAPKOMS nian iha 2022.

Projetu instalasaun Set-top Box/dexodificador RTTL,E.P ne’e, deskonfia Ministériu Asuntu Parlamentár no Komunikasaun Sosiál (MAPMKOS) estabelese liuhusi adjudikasaun direta ho DILI ENTERNAL INNOVATION INFORMATION, Lda, ho nia valor orsamentu $900,000.00. Nune’e, kustu ba instalasaun kada Set-top Box/dexodificador RTTL,E.P $30.00 ba kada uma-kain  benefisiáriu sira hamutuk 30.000 (rihun tolu-nulu) iha Dili, Liquiça, Ermera ho Manatuto.

Iha Orsamentu Jerál Estadu tinan fiskál  2021, MAPKOMS hetan rubrika transferénsia publika ho montante $3,093,528.00 no husi orsamentu ne’e inklui ona osan ho montante $900,000.00 hodi finansia ba projetu  instalasaun Set-top Box/dexodificador RTTL,E.P  hamutuk 30.000 (rihun tolu nulu) ba komunidade iha Munisípiu Dili, Liquiça, Ermera ho Manatuto.

Notísia iha Relasaun: Komunidade Becora Instala Rasik Set-top Box RTTL,E.P

Projetu instalasaun Set-top Box/dexodificador RTTL,E.P ho nia valor orsamentu $900,000.00 ne’ebé Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, estabelese ho empreza DILI ENTERNAL INNOVATION INFORMATION, Lda, deskonfia iha indísiu Korrupsaun, Koluzaun no Nepotizmu (KKN)  tanba  Ministru Francisco Martins da Costa Pereira Jerónimo, hanesan mós Prezidente Federasaun Futebol Timor Leste (FFTL) estabelese kontratu projetu refere ba fali nia sekretaria Gabinete Prezidente FFTL,  Melánia da Silva Fernandes Capela. 

Dokumentu komprovativu (Certidão do Registo Comercial) hosi SERVE,I.P  ne’ebé Hatutan.com asesu hatudu katak empreza DILI ENTERNAL INNOVATION INFORMATION, Lda, nu’udar sósiu ka shares husi Fan Yuanxiang, natural Hunan-Xina ho nasionalidade Xina no Melánia da Silva Fernandes Capela, timor-oan ne’ebé hala’o mós serbisu loron-loron nian hanesan Sekretaria iha Gabinete Prezidente Federasaun Futeból Timor Leste (FFTL), Francisco Martins da Costa Pereira Jerónimo, atuál MAPKOMS.

Projetu instalasaun Set-top Box/dexodificador  RTTL,E.P ne’e deskonfia MAPKOMS halo selebrasaun kontratu ho empreza DILI ENTERNAL INNOVATION INFORMATION, Lda, ne’ebé Melánia da Silva Fernandes Capela, nu’udar Sekretaria Prezidente FFTL nian, nu’udar mós share ka sósiu iha empreza ne’e ho persentajen sósiu  40% ($4.000,00). 

Notísia iha Relasaun: Iha Vila Verde, Set-top Box RTTL,E.P Rai De’it iha Sede Suku

Jornalista: Vito Salvadór