Hatutan.com (05 Janeiru 2024), Díli—Ministru Justisa (MJ), Amândio de Sá Benevides lakohi promete tán, maibé nia parte esforsu hela atu komunika ho empreza fornesedór ho naran Tales atu bele transporta tán kaderneta pasaporte hamutuk 52.000 mai Timor-Leste (TL) iha tempu badak, hodi responde nesesidade sidadaun sira nian.

Ministru Justisa, Amândio de Sá Benevides.

Amândio de Sá Benevides observa no rekoñese katak, nesesidade pasaporte ne’e boot tebes, liu-liu joven sira ne’ebé ho númeru boot, maibé tanba produsaun pasaporte ne’e halo iha rai li’ur nune’e tenke ho fazeadamente.

Lee Mós: Kaderneta Pasaporte Hotu, MJ Garante Estoke Foun Sei To’o TL iha Tempu Badak

“Entaun, faze ida liu bá kaderneta pasaporte 16.000 hotu ona no ita hein katak, kompañia fornesedór bele fó mensajen mai atu haruka tán pasaporte hamutuk 52.000. Ita hein sei tama mai, ha’u ko’alia orsida dehan promete fali,” Amândio de Sá Benevides hateten bá Hatutan.com iha knaar fatin, Sesta (05/01/2023).

Governante ne’e esplika katak, kompañia mós haruka mai liu hosi aviaun kargu ne’ebé la’ós tama lorloron, tanba ne’e tenke mai liu hosi Singapura, liu mai Bali hafoin tama mai Díli no presiza hein tanba iha kontratu hateten hanesan ne’e duni.

Ministériu Justisa halo kontratu ho kompañia iha fulan Outubru 2023, tanba ne’e prossesu iha Ministériu Finansas (MF) tenke selu lai kompañia liu hosi Carta de Crédito ka Letter of Credit (L/C) mak foin bele haruka pasaporte mai Timor Leste.

“Ita selu hosi LC. Tanba ne’e normalmente kompañia haruka rezultadu mai durante loron 60. Entaun, loron 60 nia laran ne’e monu iha fulan Janeiru tinan 2024 no ita espera kompañia fornesedór bele simu ona LC atu bele haruka pasaporte mai Timor,” nia espera.

Orsamentu ne’ebé mak Ministériu Justisa gasta hodi selu tán bá pasaporte atu mai ne’e hamutuk $500.000-resin.

“Ita seidauk iha data fixu kona-bá bainhira mak kaderneta pasaporte ne’e to’o Timor tanba bainhira kompañia fornesedór simu ona pagamentu hosi LC, depois mak sira bele haruka mai. Maibé, pagamentu ita halo hotu ona,” nia subliña.

Iha tempu badak MJ sei lansa mós ajendamentu online, tanba tuir loloos Servisu Rejistu Notariadu halo de’it atendimentu bá ema hamutuk 140 kada loron, maibé tanba situasaun mak nune’e, entaun tenke atende to’o kalan.

“Tanba ne’e iha Janeiru bá oin ita koko lansa programa ajendamentu online, nune’e sei atende de’it ema na’in 140. Se mak mai uluk, nia naran tama Sistema. Se númeru ema liu 140, entaun sira tuir ne’e prossesu fali loron tuir-mai atu nune’e evita situasaun hanesan iha tinan kotuk,” nia informa.

Jornalista: Gloria Maia