Hatutan.com (05 Janeiru 2024), Díli– Ministru Justisa (MJ), Amândio de Sá Benevides, prontu submete bá desizaun Primeiru-Ministru (PM), Xanana Gusmão, bainhira remodelasaun ne’e implika mós bá nia an rasik.

Lee Mós: Remodelasaun Sei Akontese Iha Marsu 2024

Primeiru-Ministru (PM), Xanana Gusmão deklara ona katak hahú fulan-Marsu 2024, nia parte sei halo ezersísiu la’o tama-sai ministériu ida-idak hodi haree besik dezempeñu servisu membru Governu hotu nian. Hirak ne’ebé halo servisu ladi’ak sei hasai no tau fali ema seluk.

Ministru Justisa (MJ), Amândio de Sá Benevides. Foto/Dok

“Atu hili no remodela memburu Governu, ne’e direitu proregatoriu husi Primeiru-Ministru. Se atu dehan remodela ha’u, ha’u prontu, ne’e konfiansa ida, se nu kazu konfiansa fó mai. Maibe bá ha’u, liafuan sira Primeiru-Ministru nian ne’e, hanesan sikote ida, oinsa atu aumenta tan ami nia espiritu  nune’e ami labele abandona ami nia servisu no ami bele servisu maka’as liu tan,” Ministru Amândio de Sá Benevides hateten hodi responde Hatutan.com iha nia knaar fatin, Díli, Sesta (05/01/2024).

Ministru Amândio de Sá Benevides haree katak afirmasaun remodelasaun hosi PM Xanana ne’e  hanesan meius ispiritu ida, hanesan aman ba Nasaun, Xefe do Governu  iha duni kapasidade no kompetensia atu hasai liafuan remodelasaun, atu nunee membru Governu inklui Ministru Justisa, atu labele tur rona deit, maibé tenke kaer servisu bá programa Governu nian ne’ebé tenke halo.

“OJE 2024 nian neebe ami husu ona no aprova ona, ami tenke ezekuta. Se nukazu, ami laiha kbiit atu ezekuta ida-ne’e, fila-fali bá Primeiru Ministru atu halo avaliasaun, tanba desijaun ne’ebé maka Primeiru-Ministru foti, atu hadi’a estrutura Governu nian, atu nune’e, dezepeña diak liu, hirak ne’e hotu kompetensia PM nian,” nia afirma.

Ministru mós prontu atu ezekuta problema hotu, maibe nia parte  haree liu bá parte pozetivu, atu nune’e fó korazen hodi hala’o   servisu, maibé se Membru Governu sira la servisu maka, ninia konsekuensia  Primeiru-Ministru fó bá ema seluk atu halao servisu, maka hanesan remodelasaun ne’e.

Molok ne’e, Forum ONG Timor-Leste ka FONGTIL nota katak durante loron 120 servisu IX Governu Konstitusionál nian fó rezultadu balun di’ak, maibé ministériu haat seidauk hatudu servisu másimu atu fó rezultadu di’ak bá povu.

Ministériu haat ne’e mak hanesan Ministériu Justisa (MJ), Ministériu Saúde (MS), Ministériu Administrasaun Estatál (MAE) ho Ministériu Edukasaun (ME).

Diretór Ezekutivu FONGTIL, Valentim da Costa Pinto hateten, saida mak sosiedade sivíl observa, liu-liu ministériu hotu-hotu iha IX Governu konstitusionál hala’o sira-nia knaar iha loron 120 nia laran iha notas lubuk ida ne’ebé  kontinua haree hosi ministériu ida-idak nian, ezemplu hanesan Ministériu Saúde (MS), ne’ebé hateten urjentemente ai-moruk sira ne’ebé tenke iha hodi fasilita   pasiente sira, maibé to’o agora, ai-moruk item balun kuaze iha ospitál no klínika kontinua laiha ka stoke out. Iha mós sira halo, adjudikasaun direita ba kompañia balun ne’ebé atu halo alojamentu, maibé too agora ne’e mós seidauk la’o.

Bá Ministériu Justisa (MJ), tuir notas FONGTIL nian katak iha duni intervensaun depois de ramata loron 120 ne’e,  liuliu kona-bá kaderneta pasaporte, maibé ne’e mós kontinua iha problema barak tanba sei iha ema barak ne’ebé hein hela atu prosesa sira nia dokumentu.

Bá fali Ministériu Edukasaun (ME), FONGTIL haree no simu rasik keixa  profesor  kontratadu sira kontinua ezije sira-nia direitu bá kontinuasaun servisu sira.

Jornalista: Gloria Maia