Hatutan.com, (08 Janeiru 2024), Díli—Jogadór estrela klube AD SLB Laulara, Kay Olo Gusmão marka pentatrick (Golu lima) hafoin ekipa ne’e manán Craigieburn Pythons ho skoree 11-1 iha jogu kontinuasaun faze grupu Timor Cup 2023 ne’ebé hala’o iha Melbourne-Austrália.

Jogadór estrela klube AD SLB Laulara, Kay Olok Gusmão marka pentatrick (Golu lima) hafoin ekipa ne’e manán Craigieburn Pythons ho skoree 11-1 iha jogu kontinuasaun faze grupu Timor Cup 2023 ne’ebé hala’o iha Melbourne-Austrália. Foto:AD SLB Laulara.

AD SLB Laulara sai hanesan ekipa favoritu iha jogu ikus faze grupu Timor Cup 2023, ho Jogadór ne’ebé maiória mai hosi Akademia AD SLB Laulara duni no kuaze joga ba selesaun nasionál Timor-Leste, AD SLB Laulara hatudu kedan jogu bonitu desde minutu uluk jogu hahú.

Lee Mós: Timor Cup 2023, AD SLB Laulara Derrota Hasoru Timor-Leste Galaxy United

Kay Olo Gusmão ne’ebé hanesan mós Jogadór prinsipál bá ekipa AD SLB Laulara hatudu nia superioridade iha jogu ne’e hodi marka golu barak liu tanba desde infánsia Kay Olo Gusmão treinu ona Futeból iha Akademia Futeból sira iha rai Austrália ne’e rasik.

AD SLB Laulara hatudu kedan sira-nia espíritu jogu bonitu desde jogu hahú, maski durante jogu udan bo’ot, ekipa AD SLB Laulara no adversáriu Craigieburn Pythons nafatin iha korazen atu kontinua jogu hodi hatudu idak-idak nia tátika oinsa domina bola no hatama golu hodi rekolla vitória atu bele hetan oportunidade ba jogu semi-finál Timor Cup 2023.

Ekipa AD SLB Laulara ne’ebé ho ambisaun hakarak hakat bá semi-final hahu halo kedan jogu ho tátika  ne’ebé di’ak no halo kedan atake ba adversáriu Craigieburn Pythons no Jogadór Kay Olo Gusmão marka kedan golu dahuluk hodi muda skore ba 1-0.

Hafoin jogu, ekipa Craigieburn Pythons mós halo esforsu atu halo balansu ba ekipa AD SLB Laulara nia jogu ne’ebé dominante tebes maibé falla no ekipa AD SLB Laulara liu hosi nia Jogadór Revelino, Figo no Aday mmarka tan golu tutuir malu hodi muda skore 4-0.

Antes termina jogu primeira parte Ekipa Craigieburn Pythons liu hosi tátika  ne’ebé iha halo kontra atake no konsege responde golu ida hodi muda skore iha tabela ba 4-1.

Tama ba segundu parte, klube rua kontinua hatudu idak-idak ninia ritmu jogu ho tátika  no esforsu ne’ebé iha, ekipa AD SLB Laulara hasae liu tan intensidade jogu ho tátika  ne’ebé iha hodi halo jogu ho bola hosi ain ba ain halo ekipa adversáriu Craigieburn Pythons falla antesipa jogu ne’ebé AD SLB Laulara iha.

Ho jogu ne’ebé di’ak no lais halo AD SLB Laulara aumenta tan golu liu hosi jogador Kay Olok Gusmão, Figo  Kevin, Aday no Eta hodi muda skore iha tabela 11-1.

Too jogu segunda parte termina ekipa AD SLB Laulara kontinua ukun ho skore 11-1, no rezulta ida ne’e lori AD SLB Laulara hakat ba semi-final enkuantu adversáriu Craigieburn Pythons obrigadu tenke fila ho liman mamu no falla hakat ba faze tuir mai.

Hafoin jogu, Kapitaun AD SLB Laulara, Filomeno Junior da Costa deklara, ekipa AD SLB mak rekolla  skore boot iha Grupu B nian prepara kompete iha semi-final.

“Hosi jogu Grupu B nian, AD SLB ohin rekolla tan pontu 11-1 hasoru Klube Craigieburn Pythons, tanba ita foin hetan vitória dala rua no derrota dala ida hasoru ekipa Timor-Leste Galaxy United Melbourn manan AD SLB 3-2. Agradese ho jogu di’ak ida ohin, ita hakat ba semi finais no ita sei halo preparasaun di’ak liután atu hasoru ekipa uma nain no klube sira seluk iha loron 10 Janeiru 2023,” Hatutan.com sita deklarasaun Filomeno Junior da Costa iha komunikadu.

Kay Olo Gusmão Top Score Provizóriu Timor Cup 2023

Jogadór estrela AD SLB Laulara Kay Olo Gusmão sai hanesan Top Score ka mellór markadór provizóriu iha jogu Timor Cup 2023 ho golu neen (6).

Mellór markadór ne’e Kay Olo Gusmão rekolla hafoin marka pentatrick iha jogu kontra Craigieburn Pythons no antes ne’e hasoru Timor-Leste Galaxy United nia marka golu ida (1).

Kay Olo Gusmão ho númeru kamijola 7 ne’e hatudu nia perfoma ida di’ak hafoin durante jogu halo kombinasaun tátika  ne’ebé di’ak ho nia ekipa.

Ho golu ne’ebé iha Kay Olok Gusmão iha potênsia bo’ot sai mellor markador tamba AD SLB Laulara hakat ba faze semi-final iha jogu tuir mai.

Jogu Timor Cup 2023 ne’ebé ekipa AD SLB Laulara partisipa asiste masimu hosi komunidade Timoroan sira iha Austrália inklui mós komunidade rai seluk ho klube lubuk ida ne’ebé partisipa taxa Timor CUP 2023.

Jornalista: Vito Salvadór