Hatutan.com, (15 Janeiru 2024), Díli—Primeiru-Ministru (PM), Kay Rala Xanana Gusmão, iha Segunda, 15 janeiru, ohin ho delegasaun hala’o ona viazen bá nasaun Suiça hodi partisipa iha Fórum Ekonómiku Mundiál (World Economic Forum) bá dala-54, iha sidade Davos-Klosters, hahú hosi loron 15 to’o 19 Janeiru 2024.

Primeiru Ministru (PM), Kay Rala Xanana Gusmão ho delegasaun arranka hosi Aeroportu Internasionál Nicolau Lobato, Comoro-Dili, bá Suiça hodi partisipa iha Forum Ekonómiku Mundiál bá dala-54, ho aviaun Citilink. Foto: Elio dos Santos da Costa.

Forum ida-ne’e hanesan forum annuál ka reuniaun kada tinan ne’ebé sei halibur parte interessada sira hosi esfera hotu-hotu mai hosi rejiaun hotu-hotu iha mundu, atu bele serbisu hamutuk iha prioridade temátika haat ne’ebé iha interligasaun mak hanesan;

Lee Mós: Xanana Partisipa Tinan 50 Simeira ASEAN iha Japaun

Alkansa seguransa no kooperasaun iha mundu ida ne’ebé laiha unidade, Intelijénsia artifisiál nu’udár forsa prinsipál bá dezenvolvimentu ekonomia no sosiedade, Kria kresimentu no emprégu iha era foun no, Estratejia longu prazu bá klimátika, natureza ho enérjia.

Programa inovativu ne’e dezenvolvidu bazeia bá reuniaun ne’ebé realiza antes ona ho nia senáriu bá sesaun sira tuir programa pilár importante haat ne’e.

“Prioritizasaun bá temátika haat ne’e tanbá ohin loron, ema, sosiedade no mós empréza sira enfrenta realidade transformasaun mundiál ho problema barak ne’ebé akontese hanesan violénsia tráziku iha médiu oriente nu’udár akontesimentu reál, mudansa profunda estruturál hahú hosi jeoekonomia, mudansa klimátika to’o inteleijénsia artifisiál,” Hatutan.com sita komunikadu.

Situasaun ne’e ejíze liu atu dezenvolve plataforma no diálogu, parseria ne’ebé forte, estabelese kuadru polítiku ne’ebé forte, implementasaun teknolojia ne’ebé efikas atu bele lori benefisiu direta no bele implemeta iha sosiedade iha kurtu prazu.

Reuniaun annuál ne’e sei aproveita másima nu’udár fórum organizasaun internasionál bá kooperasaun públiku-privada, hanesan plataforma bá diálogu inkluzivu bá tempu naruk.

PM Xanana Gusmão sei hasoru malu mós ho lider mundiál balun hodi deskute no hametin kooperasaun Timor-Leste iha seitór oin-oin ne’ebé liga ho tema fórum ekonómia mundiál.

Vizita Xefe Governu ne’e akompaña hosi ekipa Ministériu Negósiu Estranzeirus no sei fila hikas mai Timor iha loron 20 Janeiru 2024.

Jornalista: Rogério Pereira Cárceres