Hatutan.com, (15 Fevereiru 2024), Díli- Ministru Justisa foun, Sergio de Jesus Fernandes da Costa Hornai, kompromete sei halo kontrolu bá rai estadu sira ne’ebé emprezáriu sira halo arrendamentu tutan bá ema seluk hodi hetan lukru bá sira-nia interese.

Lee Mós: Empreza Nasionál no Internasionál 20-resin Fa’an no Arrenda Tutan Rai Estadu  

Ministru Justisa Sérgio de Jesus Fernandes da Costa Hornai, afirma  kona-bá rai estadu sira ne’ebé ema  ka emprezáriu sira arrenda bá halo investimentu, maibé la halo investimentu no ikus mai halo arrendamentu tutan, governu sei haree no regula.

Ministru Justisa foun, Sergio de Jesus Fernandes da Costa Hornai. Foto/Elio dos Santos da Costa

“Estadu presiza regula maibé tenke intensiva bá iha setor  privadu sira, sira mak halo investimentu iha rai ida ne’e,” Ministru Justisa Sérgio de Jesus Fernandes da Costa Hornai bá jornalista sira iha Palásiu Prezidensiál Nicolau Lobato Bairo Pite,  Díli, Kinta (15/02/2024).

Antes ne’e, iha VIII Governu Konstitusionál Ministériu identifika ona empreza nasionál no internasionál 20-resin ne’ebé fó aluga tutan rai Estadu no fa’an fali áa ema seluk la ho autorizasaun hosi Governu.

Iha ona empreza nasionál no internasionál 20-resin ne’ebé arrenda tutan bá ema seluk sen koñesimentu hosi Ministériu Justisa.

“Iha ona númeru balun ne’ebé fa’an fali rai Estadu bá parte seluk, maibé ha’u labele temi naran no atu dehan de’it katak ida-ne’e konsumu ona krime,” antigu Ministru Justisa, Tiago Amaral Sarmento hateten  iha Colmera, Kinta (28/07/2022).

Gabinete Inspesaun Ministériu Justisa  sei halo inspesaun, bainhira rezultadu relatóriu hatudu hanesan ne’e maka sei halo partisipasaun bá Ministériu Públiku (MP) tanba ne’e konsumu ona krime fraúda fiskál tanba la selu taxa bá Governu no kontra lei Tributária.

Iha kontratu arrendamentu ne’ebé Governu selebra ho emprezáriu sira hakerek momoos katak, parte hirak ne’ebé arrenda uma no rai Estadu, laiha kompeténsia no direitu hodi fó aluga tutan ka fa’an ba ema seluk sen rekoñesimentu Ministériu Justisa no  bainhira akontese ne’e krime.

Jornalista: Vito Salvadór