Hatutan.com, (26 Fevereiru 2024), Díli—Prezidente Repúblika (PR), José Ramos-Horta kondekora jornalista Brazileiru Cláudio Savaget ho medalla méritu no sertifikadu rekoñesimentu bá papél ativu iha dezenvolvimentu demokrasia Timor-Leste (TL).

Prezidente Repúblika (PR), José Ramos-Horta kondekora jornalista Brazileiru Cláudio Savaget ho medalla méritu no sertifikadu rekoñesimentu bá papél ativu iha dezenvolvimentu demokrasia Timor-Leste (TL). Kondekorasaun ne’e entregra direta hosi xefe kaza sivíl, Jesuina Maria Ferreira Gomes iha Palásiu Prezidensiál Nicolau Lobato Bairru-Pité, Segunda (26/02/2024).Foto: Média PR.

Xefe kaza sivíl Prezidénsia Repúblika, Jesuina Maria Ferreira Gomes hateten Prezidente Repúblika auzente tanba hala’o hela viajen ofisiál bá rai liur,  no  xefe kaza sivili iha onra, tuir instrusaun Prezidente Repúblika, hodi kondekora Claudio Savaget ho medalla méritu no sertifikadu rekonesimentu, ne’ebé simboliza agradese bé papél ativu no importante iha dezenvolvimentu demokrasia iha Timor-Leste.

Lee Mós: Membru Polísia Indonézia Simu Kondekorasaun Hosi Prezidente Repúblika Ramos-Horta

“Cláudio Savaget fila-fali ba Brazil hafoin tinan 10 iha Timor-Leste. Durante nia servisu nu’udár jornalista iha Timor-Leste, nia hetan oportunidade atu fó sasin, dezde 2002, Timor-Leste moris nu’udár nasaun independente, nune’e mós reziliensia, fiar no forsa povu Timor-Leste nian, ne’ebé konsege halo nia mehi sai realidade no dezde ne’e servisu ona bá kresimentu nasaun nian iha fronteira hotu-hotu, maski iha dezafiu boot sira ne’ebé eziste,” Jesuina Maria Ferreira Gomes hateten iha diskursu iha Palásiu Prezidensiál Nicolau Lobato Bairru-Pité, Segunda (26/02/2024).

Xefe kaz sivíl hodi Prezidente Republika nia naran agradese bá Claudio Savaget ne’ebé hola parte iha viajen ne’e, ho povu, hodi hakerek momentu ida-idak, hamutuk ho dezafiu sira maibé mós ho susesu sira, ne’ebé ho ninia rejistu sei husik sira-nia marka ne’ebé loos iha istória TL no sita mós Claudio nia liafuan rasik ne’ebé hateten “Sira sei hariku ema nia espíritu umanu ne’ebé tama iha rai ne’e”.

“Ami hato’o ami-nia dezeju ba ita nia susesu pesoál no profisionál ne’ebé bo’ot liu iha faze foun ida-ne’e no dala ida tán ami agradese bá imi-nia servisu no domin ne’ebé imi hatudu bá ami-nia nasaun, ne’ebé sei la haluha,” nia hakotu.

Partisipa iha serimónia kondekorasaun ne’e, embaixadór Brazil iha Timor-Leste Maurício Medeiros de Assis no konvidadu sira seluk.

Jornalista: Vito Salvadór