Hatutan.com, (04 Marsu 2024), Díli– Ró rua (2) hosi Japaun ho naran Yushin Maru 2 no Yushin Maru 3 ne’ebé daudaun ne’e atraka iha Portu Díli sai preokupasaun boot bá entidade sira iha Timor-Leste ho mós reprezentan povu iha Parlamentu Nasionál (PN).

Ró rua (2) hosi Japaun ho naran Yushin Maru 2 no Yushin Maru 3 atraka iha Portu Díli. Foto/Foti Hosi Facebook

Liuhosi plenáriu Parlamentu Nasionál, Segunda (04/03/2024), membru PN hosi Bankada CNRT, Cedeliza Faria dos Santos, aprezenta nia preokupasaun kona-bá ró Japonés nian rua (2) ne’e tanba informasaun balun ne’ebé espalla iha media Austrália nian balun katak autoridade Austrália duni hela ró rua ne’e tanba komete peska ilegál bá ikan baleia iha área tasi Austrália nian.

“Ami rona katak  ró Japanés  ne’e tama fali mai ho intensaun dehan halo peskiza, maibé realidade Austrália mós bandu ró ne’e ne’ebé ami husu bá Governu atu tau hela atensaun,” Deputada Cedeliza Faria dos Santos hateten.

Iha sesaun plenária PN ne’ebé partisipa mós hosi  Vise-Ministru asuntu Parlamentár, Áderito da Costa Hugo,  seidauk fó resposta bá asuntu ida-ne’e. Mézmu nune’e, Diretor Jerál Asuntu Bilateral Para América, Europa e África, Francisco Dionísio Fernandes ‘Mau-Kura’, relata katak ró  rua ne’ebe atraka iha Portu Dili hetan lisensa husi autoridade kompetente.

Nia dehan,  ró rua ne’e hosi Japau  ne’ebe sira-nia área peskiza ne’e iha área antartika, razaun atraka iha Portu Díli tanba sira atu fila Japaun, ho nune’e, mak sira husu lisensa  atu tranzit loron balu iha Portu Díli.

“Antes atu fó autorizasaun bá ró rua ne’e  atraka iha Portu Díli, Ministerio dos Negoçios Estrangeiros e Cooperação ( MNEC) halo koordenasaun uluk ho parte relevante hanesan APORTIL l rasik, Kapitaun Portu Dili, Ministeriu Agrikultuta no Peska, Ministeriu Interior ne’e liga ho Servisu Migrasaun, Alfándega ho autoridade hotu-hotu ne’ebe envolve iha portu,” Francisco Dionisio Fernandes’ Mau-Kura’ hato’o bá jornalista sira iha knar fatin, Edifísiu  MNEC.

Diretor Jerál Asuntu Bilateral Para América, Europa e África, Francisco Dionísio Fernandes ‘Mau-Kura’. Foto/Tome da Silva

Nia klarifika katak informasaun dehan fó lisensa bá ró refere atu halo peska ne’e laloos, tanba objetivu atraka iha Portu Díli ne’e hanesan transit deit, tula hahan, no ense kombustivel, no mos crew na’in-haat (4) sei tun hodi kontinua fali bá Japaun ho aviaun.

Durante ró rua ne’e atraka iha Portu Díli hetan seguransa masimu hosi Polísia Nasionál Timor-Leste (PNTL) no garante mos Visa ba crew nai’n-haat (4) hodi bele fila fali Japaun.

Prezidente APORTIL, Feliciano da Costa Correia mós relata katak ró rua ne’e atraka iha Portu Díli ne’e iha  lisensa hafoin MNEC mós haruka karta despaxu bá iha APORTIL hodi autoriza  ró ne’e hodi atraka.

Ró ahi rua ne’e mak atraka iha Portu Díli iha lorin 29 fulan-Fevereiru to’o loron 3 fulan-Marsu 2024 ho objetivu tu truka kombustivel no hatun crew.

Total crew iha ro rua ne’e na’in-42 ne’ebe kompostu husi Yushin Maru 2 ho crew na’in-20 no ro Yushin Maru 3 ho total crew  na’in-23.

Jornalista: Leopoldina de Carvalho/Zita Menezes