Hatutan.com, (05 Marsu 2024), Díli—Prezidente Parlamentu Nasionál, Maria Fernanda Lay deklara ajenda bá eleisaun komisáriu Comissão Anti Corrupção (CAC) ne’ebé tuir loloos realiza iha Tersa (05/03/2024) kansela tanba la prenxe korum ka deputadu sira ne’ebé marka prezensa iha plenária la to’o na’in-49.

“Tanba razaun téknika, ohin ha’u hateten tanba kuorum la to’o. Ne’ebé ha’u hanoin kuorum 34 de’it. Ne’ebé deputadu na’in 49 tenki iha, se laiha ha’u labele tau bá votasaun tanba kuorum ne’e Lei mak ezije,” Maria Fernanda Lay hateten iha PN, Tersa (05/03/2024).

Lee Mós: Governu Submete Ona Lista Rui Pereira bá Kandidatu Komisáriu CAC

Fernanda Lay dehan, PN planeia atu tau fali ajenda eleisaun Komisáriu CAC ne’e bá semana oin bainhira kuorum prienxe ho 49 deputadu prezente.

“Laiha nem buat ida mak ami subar. Ita boot sira bele bá husu iha xefe bankada sira mak halo negosiasaun ne’e. Ha’u interven kuandu iha nesesáriu se la’e bankada sira mak tenki halo negosiasaun,” nia hateten.

Iha fatin hanesan, Xefe bankada CNRT, deputadu Duarte Nunes haktuir bankada FRETILIN mós husu atu adi’a tanba sira mós presiza konsolida, no ida-ne’e importante.

“Ami nia deputadu sira balun mós seidauk mai. Entaun, ha’u ho Xefe bankada FRETILIN deputadu Aniceto Guterres Lopes ami konkorda malu atu adi’a hodi ko’alia bá malu no buka atu kompleta tanba sira mak ezije dehan tenki konsensu. Konsensu signifiká deputadu sira hosi bankada hotu-hotu tenki mai iha Parlamentu Nasionál no hotu-hotu bá fó nia votu. Ne’e mak ami kontaktu Prezidente Parlamentu Nasionál hodi adi’a bá semana oin,” deputadu Duarte Nunes hateten.

Xefe bankada PLP, deputada Maria Angelina Sarmento haktuir kona-bá kandidatu komisáriu CAC nian prossesu la’o kle’ur demais ona, bankada PLP sei haree kandidatu sé maka propoin hosi bankada CNRT hodi lidera instituisaun ida-ne’e.

“Infelizmente ajenda ida-ne’e adi’a hela de’it, ami la hatene razaun ne’e tanba saida ohin PPN inisiu plenária pronúnsia katak ajenda bá eleisaun komisáriu CAC sei adi’a tán bá semana oin bo razaun katak deputadu balun sei hala’o hela tratamentu saúde no lisensa. Sira CNRT rasik mak la prienxe 31 kadeira atu bele realiza eleisaun ne’e,” deputada Maria Angelina Sarmento hateten.

Nia hatutan, rejimentu Parlamentu Nasionál fó dalan bá deputadu sira ne’ebé mak lisensa bele substitui hosi deputadu seluk bainhira iha asuntu urjenti ne’ebé prienxe kuorum hodi halo eleisaun ruma.

“Tanba Estadu nia interese no nesesidade urjénsia liu, prioridade liu du ké prenzensa individu deputadu ida nian tanba nia la marka prezensa implika bá kuorum funsionamentu plenária,” nia tenik.

Jornalista tenta atu halo konfirmasaun ho Xefe bankada FRETILIN deputadu Aniceto Guterres Lopes, maibé la konsege tanba Xefe bankada ne’e okupadu hela ho servisu balun.

Jornalista Estajiária: Zita Menezes