Hatutan.com, (06 Marsu 2024), Díli- Timor-Leste ho Austrália no Nova Zelándia  kontinua fotalese relasaun di’ak hanesan parseiru, amigu no nasaun viziñu.
Liuhosi enkontru entre Primeiru-Ministru, Kay Rala Xanana Gusmão ho Primeiru-Ministru Austrália, Anthony Norman Albanese Tersa (05/03/2024), iha ámbitu simeira   Xefe Governu no Xefe Estadu Asosiasaun Nasaun Sudeste Aziátiku (ASEAN) nian iha Merlboune, Austrália. Xanana ho Anthony Albanese, fundamenta diskusaun kooperasaun bilateral TL-Austrália nian.

PM Xanana hasoru malu ho PM Austrália, Anthony Norman Albanese iha Melboune, Austrália, Tersa (05/03/2024). Foto/Espesiál

“Olla Primeiru-Ministru Xanana, ita di’ak ka lae? E ben-vindu mai iha simeira Austrália ASEAN nu’udár onradu bá Austrália hodi hametin kooperasaun TL-Austrália,” Primeiru-Ministru Anthony Albanese hateten bainhira simu audensia ho  PM Xanana iha Cenru Convensaun Melbourne, Austrália.

Komunikadu imprensa ne’ebé Hatutan.com asesu hosi Gabinete Relasaun públiku no mídia Primeiru-Ministru Kay Rala Xanana Gusmão nian, Kuarta (06/03/2024), relata katak Xefe Governu rai rua ho delegasaun membru Governu sira kontinua hala’o reuniaun bilaterál hodi diskute kooperasaun rai rua nian.

Primeiru-Ministru Kay Rala Xanana Gusmão ho orgullu hato’o agradese no  parabéns ba Governu Austrália, tinan ne’e, sai uma na’in ba simeira Austrália-ASEAN hodi konvida mós Timor-Leste nu’udar nasaun observadór hodi rona no aprende rai seluk nia esperiénsia.

“Ami agradese tebes ho enkontru ida ne’e ita diskute no servisu hamutuk nafatin hodi kontinua hametin kooperasaun rai rua nian ne’ebé estabelese ona,” Xanana Gusmão hateten.

Timor-Leste ho Austrália nia relasaun diplomátika no kooperasaun bilateral metin no forte tebes, dezde nasaun rua ne’e hahú estabelese nia relasaun iha tinan 20 nia laran to’o ohin.

PM Xanana agradese mós ba Governu Austrália nia domin hodi simu Timoroan rihun kontinua servisu hodi manan esperiénsia oin-oin no simu estudante Timoroan hala’o estudu iha universidade iha Austrália.

Nova Zelándia Apoia Adezaun TL Bá ASEAN

PM Xanana ho nia delegasaun hasoru malu ho delegasaun Primeiru-Ministru Nova Zelándia, Christopher Luxon iha Austrália. Foto/Espesiál

Iha Austrália, Primeiru-Ministru, Kay Rala Xanana Gusmão, kontinua hala’o enkontru bilaterál ho Primeiru-Ministru Nova Zelándia, Christopher Luxon  hodi diskute kooperasaun bilaterál ne’ebé rai rua estabelese durante ne’e no ko’alia  mós apoia Nova Zelándia bá adezaun Timor-Leste sai membru plenu ASEAN.

Sorumutuk bilaterál entre Xefe Governu Timor-Leste ho Nova Zelándia ne’e hala’o iha Otél Lanhham- Melbourne-Austrália, hafoin lider rua partisipa simeira ASEAN-Austrália, no selebrasaun tinan 50 (1974-2024) Austrália sai nu’udar parseiru estratéjiku ba ASEAN.

Primeiru-Ministru Nova Zelándia, Christopher Luxon reafirma kompromisu Nova Zelandia nian atu aliña programa apoia hodi reforsa dezenvolvimentu iha  Timor-Leste iha setór edukasaun hodi forma rekursu Timoroan no apoia setór defeza no seguransa, inklui apoia ekipa korpus bá pás no programa importante sira seluk tan, liu hosi sira-nia Embaixada  Nova Zelándia nian iha Dili.

Durante enkontru, PM Xanana hato’o agradese ba esforsu Governu Nova Zelándia hodi tulun nafatin povu Timor no ajuda hadi’a dezenvolvimentu Timor-Leste.

Nova Zelándia nu’udar pais belun ida di’ak ne’ebé haruka forsa Manutensaun Pás hodi ajuda povu no nasaun iha prosesu harii dame no harii estadu.

Enkontru Xefe Governu rai rua ne’e akompaña hosi Vise Primeiru-Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Vise-Ministra ba Asuntu ASEAN, Milena Rangel no Embaixadora Timor-Leste ba Austrália, Inês de Almeida, Xefe Gabinete Primeiru-Ministru, Elizabeth Exposto no ekipa protokolu sira.

Jornalista: Vito Salvadór