Hatutan.com, (07 Marsu 2024), Díli—Mezmu investimentu iha Portu Baia Tibar ho tipu parseria públiku privadu  (PPP) tanba Governu Timor-Leste investe ho fundu millaun $360 no empreza Bollore group tau millaun $130, maibé  prosesu Bollore fa’an share ka asaun (saham) Timor Port bá Mediterranian Shipping Company (MSC) la presiza hetan koñesimentu hosi Governu Timor-Leste.

Lee Mós: Bollore Fa’an Ona Asaun Timor Port Bá MSC

Ministru Transporte no Komunikasaun (MTK), Miguel Marques Manetelu.

Ministru Transporte no Komunikasaun (MTK), Miguel Marques Manetelu, hateten Governu la presiza hatene kona-bá kestaun Bollore fa’an ona Timor Port bá mediterranean Shipping Company ( MSC) nu’udar empreza internasionál ne’ebé nia baze iha Italia.

“Pergunta ida, se kompañia ida fó bá kompañia seluk ne’e la’ós Governu nia haree, importante bá Timor-Leste mak jestaun bá portu ne’e tenke la’o” Ministru Miguel Marques Manetelu hateten bá Hatutan.com hafoin partisipa iha seminariu kona-bá Thf project on strategic port development master plan in Timor Leste iha salaun City8, Kinta (07/03/2024).

Nia deklara katak Governu Timor-Leste iha deit akordu ida publik private partnership (PPP) ho parte investor sira ne’ebe mak hamutuk ho Estadu konstrui Portu Baia Tibar.

“Agora kestaun internal Ema nian Hau labele ba hatene. Se iha buat ruma ka jestaun ruma la la’o iha ne’eba  (Portu Tibar-red) ne’e buat seluk ida,” Nia afirma.

Nia fó komparasaun katak iha buat ruma alin-feto na’in-rua fó bá malu, ema seluk mós labele dehan la bele fó, maibe nia salienta katak Ministru Miguel Manetelu  dena, bá kestaun ne’e nia tenke konfirma  bá project management unit ( PMU) ne’ebe atu hatene informasaun ne’e pois regra ne’e hanusa.

“Bá ha’u, durante operasaun portu ne’e la’o di’ak hela, la afeta bá kontratu ne’ebe  Governu asina ho Bollore,” Ministru Miguel Menetelu informa tan.

Maske Governu ka Estadu Timor-Leste mós investe hotu iha Portu Tiber ho montante orsamentu millaun $160, Ministru Miguel Manetelu dehan, tenke haree mós artigu sira iha kontratu ne’e, presiza ka  lae, ema ida fó sasan bá ema ida seluk tenke hateten bá Governu.

Daudaun ne’e Timor Port la’ós ona parte ida hosi kompañia Bollore group tanba iha tinan ida liubá fa’an tiha ona asaun (share) bá Mediterranian Shipping Company (MSC) ne’ebé nia baze iha Italia.

Iha inísiu 2016, Timor Port ho Bollore ne’e grupu ida-de’it tanba Timor Port mós tutela bá iha Bollore African Logistics, maibé dezde tinan ida liubá Bollore African Logistics fa’an ona asaun (share) bá  Mediterranian Shipping Company (MSC) entaun Bollore ho Timor Port la hamutuk ona.

Diretór ezekutivu Timor Port S.A,  Rafael Ribeiro iha Portu Baía Tibar, Kuarta (06/03/2024), informa Bollore fa’an asaun Timor Port bá MSC tanba razaun negósiu (business). Nune’e, hafoin MSC sosa tiha kompañia Bollore African Logistics  muda fali naran African Global Logistics.

“Agora Bollore ketak ona, kompañia Bollore nafatin,  Timor Port ketak ona iha fali African Global Logistic nia parte, ne’ebé tutela bá  Mediterranian Shipping Company ( MSC),” Rafael Ribeiro hateten.

Ho fa’an tiha asaun Timor Port ne’e, maka  Bollore nu’udár kompañia lojístika ne’ebé servisu halo atendimentu bá ró, la’ós ona operasaun bá portu, Enkuantu Timor Port mak halo operasaun bá Portu Baia Tibar tuir kontratu durante tinan 30 hahú husi tinan 2018.

Jornalista: Leopoldina de Carvalho