Hatutan.com, (24 Marsu 2024), Díli—Governu Timor-Leste (TL) ho Nova Zelándia hala’o diskusaun kona-bá dezenvolvimentu seitór turizmu Timor-Leste nian no oinsá bele fó kapasitasaun rekursu umanu bá Timoroan sira iha futuru.

Vise-Primeiru Ministru, Ministru Koordenadór bá Assuntu Ekonómiku, Ministru Turizmu no Ambiente, Francisco “Dato Sri” Kalbuadi Lay simu vizita hosi Embaixadora Nova Zelándia, Hellen Tunnah iha Gabinete Ministru Turizmu nian, Faról-Díli, Kinta (14/03/2024). Foto: Tomé da Silva.

Diskusaun bá asuntu importante rua ne’e liuhosi sorumutu bilaterál ne’ebé hala’o entre Vise-Primeiru Ministru, Ministru Koordenadór bá Assuntu Ekonómiku, Ministru Turizmu no Ambiente, Francisco “Dato Sri” Kalbuadi Lay ho Embaixadóra Nova Zelándia, Hellen Tunnah iha Gabinete Ministru Turizmu nian, Faról-Díli.

Lee Mós: Governu TL Hato’o Solidariedade bá Nova Zelándia Ne’ebé Enfrenta Dezastre Naturál

Francisco Kalbuadi Lay hateten, sorumutu ho embaixadora ne’e, tanba Timor-Leste ho Nova Zelándia iha ona relasaun bilaterál kleur no Nova Zelándia hanesan mós rai ida ne’ebé mak ajuda TL dezde kedan tinan 1999 to’o ohin loron.

“Sira mai reafirma katak, Nova Zelándia koopera, no mós ajuda iha seitór oioin,  liu-liu ohin ho embaixadora ko’alia barak liu iha seitór turizmu no mós iha seitór privada. Ida-ne’e iha futuru ami sei haree hamutuk iha área ida-ne’e, kapasitasaun bá iha rekursu umanu nian, ida mós maka ami foin daudaun mensiona, embaixadóra sira mak sei ko’alia sobre traballadór sira nia futuru,” Francisco Kalbuadi Lay hateten hafoin sorumutu, Kinta (14/03/2024).

Francisco Kalbuadi salienta katak, iha buat barak ne’ebé mak durante ne’e Governu Nova Zelándia halo ona bá TL mak hanesan, edukasaun, dezenvolvimentu kapasidade iha área oioin,  kontinua halo hodi ajuda nafatin Timoroan sira.

Iha ámbitu selebrasaun aniversáriu tinan 50 no simeira ASEAN-Australian, foin lalais iha Melbourne, Primeiru-Ministru Nova Zelándia, Christopher Luxon ho PM Xanana Gusmão, realiza tiha uluk ona enkontru bilaterál, konfirma katak, rai rua ne’e sei reforsa tán, sei kontinua suporta malu bá iha área oioin.

Embaixadóra Nova Zelándia mai Timor-Leste, Hellen Tunnah agradese bá Vise-Primeiru Ministru, tanba bele disponibiliza tempu hodi hasoru-malu ho nia delegasaun, sente kontente tebes hodi bá hamutuk diskute relasaun di’ak entre nasaun rua.

“Ami ko’alia kona-bá kooperasaun iha área agrikultura, turizmu, dezenvolvimentu no hein bá diskusaun sira iha seitór privádu nian iha futuru. Ami hanoin kona-bá tinan 25 ne’ebé ami-nia relasaun ho ami-nia maluk sira hahú kedan hosi tinan 1999. Ami ko’alia liu-liu bá iha área turizmu, seitór privádu nomós iha futuru, programas balun ne’ebé relevate ho seitór privádu nian,” Hellen Tunnah, hateten.

Jornalista: Rogério Pereira Cárceres