Hatutan.com, (18 Marsu 2024), Díli—Empreza importadór foos subsídiu   Perisos, Lda, husu Vise-Primeiru Ministru, Ministru Koordenadór asuntu Ekonomia, Ministru Turizmu no Ambiente, Francisco Kalbuadi Lay atu aprezenta provas kona-bá deskonfia importadór foos subsídiu sira halo manipulasaun.

Lee Mós: Deskonfia, Manipulasaun iha Subsídiu Foos

Loja Creative Furak ne’ebé mós hanesan importadór bá foos subsídiu partiispa iha Feira MCI ne’ebé hala’o iha Portu Díli, Segunda (18/03/2024). Foto/Elio dos Santos da Costa

“Ami fa’an foos ne’ebe mak Governu fó subsidiu $5.00 kada saka, ezemplu ami fa’an $9.00 kada saku 20kg Governu fó subsidiu $4.00, maibe diskunfia iha manipulasaun tenke aprezenta  provas iha parte ami nian ne’e garantia katak laiha manipulasaun, no relatoriu ami hato’o ona Ministeriu Komérsiu no Indústria (MCI) halo verifikasaun,” diretór ezekutivu empreza Perissos, James Jong  hateten hodi responde Hatutan.com  liuhosi telefónika, Segunda (18/03/2024).

Nia informa katak  durante ne’e komunikasaun diak ho parte relevante hanesan MCI,  maibe besik fulan lima ka tama ona bá fulan-neen prosesu pagamentu to’o agora sei atraza no bainhira bá konfirma, Governu ka parte relevante sira fó razaun katak sei halo verifikasaun.

Nain bá empreza Perissos Lda ne’e mós rezeita ho deklarasaun husi Vise-PM Francisco Kalbuadi Lay ne’ebé hateten katak empreza sira aproveita ho oportunidade subsídiu ne’e hodi manipula folin foos ne’e empreza sosa ona antes ne’e ho folin baratu, maibé hasae folin hodi bele hetan subsídiu.

Nia husu atu Governu bele halo verifikasaun ka konfirmasaun  bá invoice sira ne’ebe empreza halo kompras iha rai-li’ur hodi hatene katak foos ne’e baratu duni ka folin sa’e maka’as ona, maibe haree ba kuantidade konsumu iha Timor Leste kada fulan bele atinje hosi 13.000 to’o 15.000 ho nune’e foos ho kuantidade boot ne’e labele rai iha armazen durante tempounaruk.Tanba ne’e nia husu ba governu atu halo korolu bá loja kiik sira ne’ebe mak faan foos.

“Sira mak lori ba fan iha terrenu, tuir sira ne’ebe mak governu deside ona katak iha area Dili labele fan presu liu husi $10.00  Enkuantu iha loja kik ruma mak fan presu liu fali $10.00 mak governu tenkehalo kontrolu hodi fo sansaun ruma,”  nia hateten.

Tuir dadus empreza Perissos Lda mós distribui ona foos hamutuk etapa datoluk ho kuantidade foos tonelada  7.500 husi numeru ne’e kada etapa distribui tonelada 2.500 no subsidiu ba kada saka mak saka foos 20kg hetan subsidiu $4.00 no foos subsídiu 25kg hetan subsidiu $5.00 hosi Governu

Sei Selu iha Tempu Badak

Vise-Ministru Komérsiu no Indústria (MCI), Agusto Junior Trindade. Foto/Elio dos Santos da Costa

Liga ho preokupasaun husi kompañia importadór sira kona-bá subsídiu foos ne’ebé Governu seidauk selu bá empreza sira-ne’e, Vise-Ministru Komérsiu no Indústria (MCI), Agusto Junior Trindade hateten nia parte fó ona orientasaun bá xefe gabineti ho assessor no mós diresaun regulasaun komérsiu hodi halo enkontru Ministru Koordenadór asuntu Ekonomia, Francisco Kalbuadi Lay atu haree situasaun ne’e nune’e bele rezolve no halo pagamentu iha tempu badak.

“Dokumentu, invoice ne’ebe tama la’ós uitoan, tonelada 7.500 ne’e nia nota hira, entaun tenke halo data entry idak-idak manualmente hodi nune’e bele halo verifikasaun  ho sira nian hotu ita hatama hodi bele halo prosesu pagamentu,” Agusto Junior Trindade hateten.

Tuir nia, verifikasaun ne’e importante atu bele konfirma relatóriu empreza importadór sira kona-bá foos subsídiu ne’e refleta duni realidade no dokumentu Governu nian ka lae no kondisaun iha terrenu, povu simu duni foos sira ne’e ka lae.

Agusto Junior mos rekoñese kona bá manipulasaun iha subsídiu foos ne’e maibe tuir Agusto manipulasaun ne’e la’ós mosu iha kompañia importador ,maibe husi loja intermediariu sira mak halo.

“Kompañia primeiro mão dehan foos ne’e folin $9.00, maibé hafoin lori bá loja presu sa’e bá $10.00 no $11.00 kada saku, depois hola iha ne’e ba fan iha deit iha Tasi Tolu $15,00 ba fan iha Hali-Laran $15.00 lolos presu ida ne’ebé razoavel mak tuir lista ida forma ne’ebe sira hakerek, sira mai hola $9.00 sira bá fan iha Dili laran $10.00,” Agusto Junior subliña tan, tanba ne’e presiza iha esplikasaun ne’ebé di’ak no loos ba iha  komunidade sira no Estadu katak problema manipulasaun ne’e la’ós mai husi kompañia iimportador, maibe hosi kompañia intermediariu no sei lao hela.

 Jornalista: Leopoldina de Carvalho