Hatutan.com, (27 Marsu 2024), Díli-Sidadaun estranjeiru ida ho nasionalidade Xina ho inisiál ZL,  Kuarta (27/03/2024), hale’u tuku 15:00 Otl, submete bá Primeiru Interrogatóriu Judisiál iha Tribunál Judisiál Primeira Instánsia Díli (TJPID) tanba deskonfia envolve iha krime falsifikasaun dokumentu pasaporte ne’ebé durante ne’e utiliza hodi buka serbisu no hela iha Timor.

Lee Mós: Ministériu Públiku Sei Halo Estradisaun bá Fujitivu Arnolfo Teves Jr

Sidadaun estranjeiru ida ho nasionalidade Xina bá hatna iha Tribunál tanba deskunfia hlao falsifikasuan bá pasaporte. Foto/Tome da Silva

Arguido ZL iha nia dokumentu pasaporte hamutuk haat, ida prodús iha Outubru 2021, rua prodús iha Outubru 2023, no kaderneta pasaporte ida tán prodús iha Dezembru 2023.

 Hosi dokumentu haat ne’e, kaderneta pasaporte rua nafatin ho naran ne’ebé loloos alias ZL no rua seluk arguido muda tiha ninia naran bá Chengzhang LI (CL), katak identidade ne’ebé falsu.

Pasaporte sira sei moris hotu, no tuir prazu ne’ebé iha katak, pasaporte rua nia validade sei to’o iha 2032, no rua sei to’o iha 2033.

Iha Domingu, 24 fulan-Marsu 2024, hale’u tuku 16.00 Otl, Polísia Nasionál Timor-Leste (PNTL) liuhosi ekipa Departamentu Investigasaun Kriminál (DIK), kaptura arguido ZL iha Aeroportu Internasionál Nicolau Lobato, Díli tanba hetan deportasaun hosi Autoridade Migrasaun Denpasar-Bali, Repúblika Indonézia.

Informasaun hosi ekipa investigasaun kriminál PNTL nian katak, molok ne’e suspeitu komete tiha ona iha kazu lubun ida iha ninia nasaun orijen, liu-liu kazu falsifikasaun dokumentu. Ho nune’e, suspeitu buka dalan troka ka muda tiha ninia identidade sira hanesan naran kompletu, data no fatin moris, inklui hela fatin.

Hafoin ida ne’e, suspeitu buka dalan hodi halai mai buka servisu no hela iha Timor-Leste. Durante iha Timor, suspeitu hela iha área Colmera no servisu mós iha kompañia ida naran Timor Agro-Peska, lokaliza mós iha fatin ne’ebé mak hanesan. Tanba ne’e, krime ne’ebé suspeitu komete mak hanesan, Burla Agravadu, Falsifikasaun Dokumentu.

La’ós ne’e de’it, maibé autoridade polisiál sira deskonfia mós katak, arguido ne’e hanesan pesoál servisu intelijénsia Xina nian mai Timor-Leste.

Audiénsia primeiru interrogatóriu ne’e prezide hosi Juiz Singular Afonso Carmona, Ministériu Públiku (PM) reprezenta hosi Prokuradór Pedro Baptista, no Arguido hetan Asisténsia legál Advogadu Octâvio Cardoso.

Jornalista: Rogério Pereira Cárceres