Hatutan.com, (02 Abríl  2024), Díli– Sekretáriu Jerál ASEAN, Kao Kim Hourn, Tersa (02/04/2024),  halo vizita kortezia bá Parlamentu Nasionál (PN) hodi haree direita atividade no servisu segundu órgaun soberanu RDTL ne’e relativa ho prosesu Timor-Leste nia adezaun bá ASEAN.

Lee Mós: Adezaun TL bá ASEAN Sai Prioridade IX Governu Konstitusionál

Sekretáriu Jerál ASEAN, Kao Kim Hourn, foto hamutuk ho membru PN sira, Tersa (02/04/2024). Foto/Tome da Silva

Vizita kortezia Kao Kim Hourn  ne’e  simu onra hosi Prezidente Parlamentu Nasionál (PPN) Maria Fernanda Lay hodi haree kompromisu  politíka hosi membru PN ho Xefe Bankada Parlamentár Timoroan sira-nian liga ho Timor-Leste nia adezaun bá ASEAN iha tinan oin.

“Espera katak nia hakarak mai haree oinsá ita nia preparativu, inkluí mós aprová tratadu sira ita iha 66 tratadu ne’ebé prontu ona atu lori mai Parlamentu Nasionál  no  Sekretáriu Jerál ASEAN ne’e mai haree ita-nia preparativu sira ne’e hotu ita iha seriédade duni ka lae,” PPN Maria Fernanda Lay informa bá Jornalista sira hafoin simu vizita ekretáriu Jerál ASEAN  nian ne’e iha PN.

Maria Fernanda Lay haktuir  katak ho vizita kontezia Sekretáriu Jerál PN espresa  politíka kompromisu atu tama bá ASEAN tanba  fiar katak sai membru ASEAN nian hamutuk ho nasaun sira iha ASEAN sei lori benefísiu mai povu Timor-Leste no mós liuliu bá  joven sira iha futuru.

“Rekomendasaun hosi Sekretáriu Jerál ASEAN hato’o katak servisu la fasil konserteza katak  iha enkontru lubuk ida  ita tenke partisipa, nune’e mós preparativu mós ho lei saida mak Parlamentu Nasionál tenke prepara para atu bele aselera ita nia adezaun bá ASEAN iha tinan oin,” Maria Fernanda Lay informa.

Parlamentu Nasionál  mós espera Governu  haruka lalais partisipasaun membru sira hosi ASEAN nian atu  bele hala’o servisu ne’e di’ak liu hanesan team member iha ASEAN.

Jornalista Estajiária: Zita Menezes