Hatutan.com, (22 Abríl 2024), Díli-Polísia Nasionál Timor-Leste (PNTL) liuhosi Departamentu Tránzitu Nasionál (DTN) sei aplika sansaun administrativa bá membru PNTL ho membru FALINTIL-Forsa Defeza Timor-Leste (F-FDTL)  ne’ebé viola Lei Númeru 03/2006, kona-bá Kódigu Estrada durante halo sirkulasaun iha territóriu nasionál.

Lee Mós: Motór 90 Viola Kódigu Estrada Iha Díli

Xefe Departamentu Tránzitu Nasionál no Seguransa Rodoviáriu, Superintendente Asistente Polísia Luis Costa. Foto/Dok

Xefe Departamentu Tránzitu Nasionál no Seguransa Rodoviáriu, Superintendente Asistente Luís Costa, esplika funsaun hosi Lei Kódigu Estrada  atu regula sidadaun hothotu no sé de’it mak ho sira-nia transporte privádu no públiku bainhira halo sirkulasaun iha kapitál nasaun no mós iha munisípiu sira tenke hakru’uk bá Lei.

“Lei Kódigu Estrada  la fó tratamentu espesial bá membru PNTL ho F-FDTL tanba lei kódigu estrada Númeru 03/2006, ne’e nia válidu bá ema hotu. Ne’ebé, sé de’it maka sirkula iha via públiku ho transporte públiku no mós transporte privádu, lei ne’e maka sei garante ema hothotu ninia sirkulasaun,” Luís Costa, hateten bá jornalista sira iha kna’ar fatin Kuartel Jerál PNTL, Caicoli-Díli, Segunda (22/04/2024).

Komandante Tránzitu Nasionál no Rodoviáriu ne’e dehan, situasaun balu durante ne’e mosu bainhira nia membru sira halo pasa-revista iha terrenu, iha membru PNTL ho F-FDTL balu mak hatudu fali sira-nia kartaun (ID Card) servisu nian. Maibé, iha altura ne’ebá, nia rasik fó orientasaun katak, laiha ema ida mak hetan tratamentu espesial, tanba Lei Kódigu Estrada vále bá sidadaun hotuhotu.

“Labele, iha situasaun balu, mosu kazu balu, fó fali kartaun espesial sira ne’e, karta, ID Card servisu nian, ida ne’e, ami la presiza. Ami presiza primeiru mak ne’e, ó kondús karreta, motór, nia karta kondusaun ne’e mak ó lori. La’ós fali kartaun Polisia ka ó fali kartaun F-FDTL, ne’e ha’u la persiza,” Luís Costa afirma.

Tuir loloos autoridade seguransa ho defeza mak tenke sai ezemplu bá sidadaun sívil sira atu bele kumpre lei sira hotu ne’ebé vigora. Ho nune’e, Luís Costa husu bá públiku bainhira deteta ka haree hetan membru PNTL ho F-FDTL sira ne’ebé laiha karta kondusaun, maibé, membru Tránzitu sira ne’ebé halo pasa-revista mak haruka liu de’it, bele hato’o keixa bá superior sira nune’e bele prosesa tuir lei ne’ebé vigóra.

Dadus hosi Departamentu Tránzitu Nasionál, rejista katak, iha atividade pasa-revista, auto-stop ne’ebé hala’o iha Sesta (19/04/2023), konsege prende motorizada hamutuk 78, tanba infratór sira balu haluha dokumentu, balu laiha duni dokumentu, balu dokumentu liu prazu, balu karta kondusaun mate.

Jornalista: Rogério Pereira Cárceres