Hatutan.com, (24 Abríl 2024), Díli-Fujitivu Arnolfo “Arnie” Alimpit Teves Jr submete ona rekursu bá Tribunál Rekursu (TR) kona-bá prosesu sira liga ho estradisaun ne’ebé Ministériu Públiku sei halo hamutuk ho Tribunál Estadu Filipina.

Lee Mós: Ramos-Horta Kondena Membru PCIC Husu Osan, Laiha Baze Legál bá Fuzitivu Teves Hetan Azilu Polítiku iha TL

Arnolfo Tevdes Jr. Foto/Espesiál

Prezidente Tribunál Rekursu (PTR), Deolindo dos Santos, Kuarta (24/04/2024), informa Tribunál Rekursu simu ona rekursu husi parte fujitivu Teves Jr  kona-bá nia prosesu sira liga ho estradisaun ne’ebé MP sei halo hamutuk ho Tribunál Estadu Filipina.

“Bá iha prosesu ne’e pendente hela, ha’u labele hasai ha’u nia opiniaun nu’udár juis, nu’udár mós Prezidente Tribunál Rekursu, nune’e mós kolega na’in-tolu ne’ebé hanesan juis konselleiru iha ne’e mós labele emite opiniaun ruma kona-bá prosesu ne’ebé pendente hela. Tamba agora daudauk ne’e iha hela rekursu ida ne’ebé tama hela iha ne’e no ami na’in-haat mak sei apresia fila fali, tan ne’e ha’u ho kolega na’in-tolu labele hatete uluk fali saida mak ami atu halo ne’e,” PTR Deolindo dos Santos informa  bá jornalista sira iha konferénsia ba imprensa ne’ebé hala’o iha edifísiu Tribunál Rekursu, Caicoli, Díli.

Deolindo dos Santos esplika antes ne’e Ministériu Públiku no Polísia Sientífika Investigasaun Kriminál (PCIC, sigla portugés) kumpre mandadu detensaun hodi halo detensaun bá fujitivu Arnolfo Teves Jr no desizaun ne’e sai, prokuradoria haruka prosesu mai iha Tribunál Supremu, estabelese prazu balun iha ne’ebá no mós fó kompeténsia bá instituisaun balun ne’ebé lei ne’e estabelese para atu kumpre no ida-ne’e independente ona husi Tribunál nia kompeténsia, ne’ebé ne’e kompeténsia órgaun seluk ne’ebé Tribunál labele ultrapasa.

“Rekursu husi Fujitivu Arnolfo Teves Jr nian mai ona iha Tribunál Rekursu no ami sei apresia,” Nia subliña.

Kona-ba Fujitivu Arnolfo Teves Jr nia pedidu husu azilu polítiku iha Timor-Leste ne’e kompeténsia Ministériu Interiór nian mak bele foti desizaun no bainhira sidadaun ne’ebé husu azilu la konkorda bele rekorre ho rekursu kontensiozu tama iha Tribunál primeira Instánsia no iha ne’ebá mak sidadaun ne’e kontinua la simu maka rekorre mai iha Tribunál Rekursu, maibé Tribunál Rekursu indefere tamba la tuir tramitasaun legal ne’ebé iha.

Nia esplika liután katak kona-bá azilu polítiku ne’ebé fujitivu Arnolfo Teves Jr  nu’udár sidadaun estranjeiru ho nasionalidade Filipina husu ne’e iha duni rekursu ida mai iha ne’e, maibé la kumpre tramitasaun legal maka Tribunál Rekursu rejeita nia rekursu.

Antes ne’e, Segunda , 25 fulan-Marsu 2024, Prokuradór Jerál  Repúblika Alfonso Lopes hateten Ministériu Públiku (MP) sei halo estradisaun bá fujitivu Arnolfo Teves Jr ne’ebé komete krime asasinatu iha Filipina no oras ne’e kumpre hela detensaun provizóriu iha prizaun Becora, Díli.

Tuir Lei númeru 15/2011 bainhira iha detensaun internasionál, depois simu dokumentu sira ne’e tenke transmite ka haruka mai PGR nune’e bele halo promosaun bá Tribunál Supremu, maibé tanba Timor-Leste seidauk iha, entaun haruka de’it bá iha Tribunál Rekursu (TR) tuir Lei haruka.

Oras ne’e daudaun sidadaun Filipina ne’e kumpre hela detensaun provizóriu hodi hein prosesu administrativu hosi autoridade Filipina nian mai iha PGR nune’e bele halo estradisaun.

Jornalista: Vito Salvadór