Hatutan.com, (24 Abríl 2024), Díli—Empreza nasionál Sali-Magu Unipessoal Lda, daudaun ne’e, hatama tan ai-moruk item 11 no produtu reagentes item 118 hodi kumpre dever kontratu ho Ministériu Saúde hodi fornese produtu farmaséutika no produtu medikamentu bá Institutu Nasionál Farmásia no Produtu Médiku (INFPM).

Lee Mós: Sali-Magu Kontínua Fornese Ai-moruk no Konsumaveis bá INFPM

Produtu reagentes ne’ebé Sali-Magu hatama hosi Aeroportu Internasionál Prezidente Nicolau Lobato, Díli, Segunda (22/04/2024). Foto/Elio dos Santos da Costa

Diretór Ezekutivu Sali-Magu, Sansão Gomes, Kuarta (24/04/2024), informa dezde Segunda horibainrua (22/04/2024), ai-moruk item 11 tama ona iha portu Baía-Tibar no parte Autoridade Aduaneira ka Alfándega halo hela verifikasaun no konfirmasaun bá lista ka clearings  hosi Ministériu Saúde atu empreza kumpre nia devér selu 5% taxa importasaun nian.

Iha loron hanesan Sali-Magu mós hatama reajente item 118 hosi Aeroportu Internasionál Prezidente Nicolau Lobato, Díli, tuir nia etapa. Tanba ne’e, dezde Segunda to’o Kuarta ohin, Sali-Magu kontinua hatama produtu reagentes liuhosi Aeroportu ho fazeadamente to’o kompleta item 118.

Advertisement

“Produtu reagentes ne’e tenke hatama ho aviaun liuhosi aeroportu tanba nia tenke ho nia temperatura malirin no bainhira to’o iha Aeroportu parte Alfándega halo tiha verifikasaun no konfirma ho lista hotu pois tula keda bá karreta cool box  lori bá entrega bá INFPM. Bá kuantidade produtu reagentes ne’ebé tama mai tuir aviaun ho etapa to’o item 118 ne’e tama hotu mai Timor-Leste,”  Sansão Gomes informa hodi responde Hatutan.com.

Produtu reagentes. Foto/Elio dos Santos da Costa

Nia hateten dezde Sali-Magu hetan kontratu hosi Governu hodi fornese produtu farmaséutika no produtu medikamentu  bá INFPN hatama ona dala-10 ho total item lubuk ida no tuir estimasaun Sali-Magu nian katak molok to’o fulan-Juñu 2024, Sali-Magu hatama hotu ona produtu medikamentu no produtu farmaséutika bá Ministériu Saúde liuhosi INFPM tanba produtu hirak ne’e fabrika prodús hotu ona  ka stoke ready atu hatama mai Timor-Leste.

Molok ne’e, iha loron 18 fulan-Marsu 2024, INFPM simu produtu Reagentes Microbiologya, Hematologya & Biochemistry hosi kompañia Sali-Magu ne’ebé sei utiliza iha Ospitál Nasionál Guido Valadares (HNGV), ospitais referral no Sentru Saúde sira iha territóriu Timor-Leste.

Iha loron 23 fulan-Marsu 2024, Sali-Magu kontinua hatama tan  produtu konsumaveis bá Maquina X-ray bá HNGV no ospitál referral sira.

Iha  loron 28 fulan-Marsu 2024, INFPM simu tan produtu  reagentes hosi Sali-Magu Lda. Produtos sira-ne’e sei uza iha Laboratoriu Nasionál (LabNas) HNGV, ospitál referral no sentru saúde sira no simu mós produtu medíkamentu  hamutuk item  ualu (8) ne’ebé sei rai iha Armazen Sentrál INFPM.

Jornalista: Leopoldina de Carvalho

Advertisement