Hatutan.com, (28 Abríl 2024), Díli – Eleisaun órgaun Suku Manleuna, Postu Administrativu Dom Aleixo, Munisípiu Díli tenke hakat bá segunda ronde tanba votu ne’ebé kandidatu xefe suku sira hetan la prienxe rekizitu 50%+1.

Lee Mós: Eleisaun Órgaun Suku iha Madohi ho Bebonuk Hakat Bá Segunda Volta

Eleisaun Órgaun suku iha Suku Manleuana hakat bá segunda volta ne’ebé sei realiza iha loron 13 fulan-Maiu 2024. Foto/Lazaro Pereira Quefi

Suku Manleuana ne’ebé hala’o órgaun suku iha loron 27 fulan-Abríl 2024, iha nia kandidatu xefe suku na’in-haat, mak hanesan; Alexandre Soares Dias hetan   votu 1,112, Francisco Tilman (1.033), Jacob Tilman Soares (1.835) ho Natercio Ximenes Lago hetan votu 359.

Hosi rezultadu eleisaun órgaun suku iha Manleuana, hatudu kandidatu na’in-rua; Jacob Tilman Soares ho Alexandre Soares Dias avansa bá  eleisaun órgaun segundu volta ne’ebé mak sei hala’o iha loron 13 fulan-Maiu 2024.

Prezidente meza apoiu eleisaun suku, Eustáquio Tilman  hateten liga bá iha lei CNE ho STAE artigu 71 númeru 1 define katak bá kandidatu ida ne’ebé mak manan tenke ho votu válidu nune’e mós tenke to’o metade tanba ne’e mak iha votu nulu ho branku la konta.

Iha artigu 71 númeru 2 hateten karik hosi kandidatu na’in hirak ne’ebé mak sura total hosi votu válidu depois fahe bá rua depois +1 mak la atinje 50%+1 maka sei avansa bá eleisaun segundu volta tanba ne’e laliu hosi loron 15 nia laran tenke realiza eleisaun ne’e rasik.

“Ba kandidatu ne’ebé mak sai hanesan vendedór ka manan na’in iha eleisaun suku ne’e tenke to’o metade hosi votu validu ne’ebé mak iha, la konta ho votu no branku ne’e ita nia lei mak hateten, ita labele inventa sasán, tanba ne’e ita avansa ba segunda volta tanba ita nia metade la to’o,” prezidente meza apoiu eleisaun Suku Manleuana, Eustáquio Tilman  hateten.

Iha fatin hanesan Administrator Postu Administrativu Don Aleixo, Munisípiu Díli, José Soares Terminator hateten iha faze apuramentu ida ne’e populasaun hotu-hotu iha Suku Manleuna hatene ona katak iha kandidatu xefe suku na’in-rua  (2) mak sei avansa bá eleisaun segundu volta ninian, nune’e iha tempu badak nia laran sei akontese dala ida tan hodi hili lider komunitáriu.

Prezdeinte Meza Eleisaun Órgaun Suku Manleuana pronúnsia rezultaduno deklara hakat bá segunda volta ne’ebé sei realiza iha loron 13 fulan-Maiu 2024. Foto/Lazaro Pereira Quefi

“Eleisaun Segundu volta sei mai iha loron 13 fulan-Maiu 2024, ha’u husu bá hotu-hotu tenke partisipa fó nafatin sosializasaun no  diseminasaun informasaun bá komunidade atu partisipa ho másimu. Se eleisaun mak ita la hili ita-nia lideransa komunitáriu ita atu bá ne’ebé loos atu trata dokumentu ka surat ruma atu halai bá ne’ebé,” José Soares Terminator afirma.

Nia husu bá kandidatu xefe suku na’in-rua ne’ebe mak avansa bá segunda volta tenke haree malu di’ak nafatin hatudu, ezemplu di’ak ba populasaun hotu iha Manleuna atu sira banati tuir.

Iha fatin hanesan kandidatu ho númeru (3), Jacob Tilman Soares dehan bá faze atu avansa bá segundu volta ne’e programa hosi STAE no CNE ninian tanba valor ka rezultadu ne’e votu ne’ebé mak akontese tama bá apuramentu  la prienxe rekizitu 50%+1.

 “Bá oin ha’u sei prepara an no oinsá mak tun fali bá iha baze hodi halo sosializasaun hodi prepara bá eleisaun segundu volta nian. Maibé buat hotu iha povu nia liman, povu mak deside,”  Jacob Tilman Soares  hateten.

Suku Manleuna iha Aldeia 10 mak hanesan; Badiac, Efaca, Lemocari, Lisibutak, Lau-lora, Mauc, Mane mesak, Manleuan, Mundu Perdido no Ramelau.

Abitante sira ne’ebé horik  iha Suku Manleuna hamutuk 7.891 nune’e partisipante iha eleisaun órgaun suku tinan nne’e hamutuk 4.533 no la partisipa hamutuk 3.358, votu nulu 165 no branku 29.

Jornalista Estajiáriu:  Lazaro Pereira Quefi