Hatutan.com, (09 Maiu 2024), Dili—Diresaun Nasionál Regulasaun Komérsiu no Protesaun Konsumidór (DNRKPK) iha Ministériu Komérsiu Indústria (MKI) rekomenda bá ekipa konjunta atu prosesa kompañia ne’ebé prodús ice cream ho marka CYC la ijiene tuir Lei ne’ebé vigora.

Diretóra nasional DNRKPK, Manuela Silva Tilman. Foto: Tome da Silva.

Rekomendasaun ne’e DNRKPK hato’o bazeia bá inspesaun ekipa konjunta kompostu hosi AIFAESA I.P, Ministériu Saúde, Inspesaun Geral do Trabalho (IGT), SERVE,I.P iha sesta 05 abríl 2024 detekta fatin produsaun ice cream hosi kompañia CYC Chen Yancai iha aldeia Golgota suku Comoro, postu administrativu Dom Aleixo, la ijiene.

Lee Mós: Governu ho Polísia Taka Fabrika Ice Cream Tanba La Ijiene

Iha prosesu inspesaun no fiskalizasaun ekipa identifika irregualidade ka faktus balun ne’ebé la merese bá produsaun ba ice-cream ho marca CYC ne’ebé espalla ona iha territóriu nasionál.

Diretóra nasional DNRKPK, Manuela Silva Tilman rekomenda bá AIFAESA,I.P atu foti medida tuir regulamentu ne’ebé hatur ona, bá parte SERVE,I.P atu foti medida tuir regulamentu iha dekretu-lei 83/2022 kona-bá atividade ekonómiku.

Jornalista Leopoldina de Carvalho hala’o entrevista ho diretora nasional DNRKPK, Manuela Silva Tilman. Foto: Tome da Silva.

“Tanba durante inspesaun, empreza la aprezenta deklarasaun prévia bá sira nia atividade ekonómiku kona-bá produsaun no la aprezenta dokumentu konba-bá sesaun bá kuotas hodi fa’an. Empreza refere bá fali sósiu foun,” Manuela Tilman hateten bá Jornalista Hatutan.com iha knaar-fatin, kinta (09/05/2024).

Parte DNRKPK mós simu ona relatóriu inspesaun no fiskalizasaun no relata ona bá Ministru inklui no Vise-Ministru Komésiu no Indústria hodi hola desizaun ruma.

“Ami mós entrega ona relatóriu maibé Ministru ho Vise-Ministru seidauk iha resposta. Ami hein hela,” diretora ne’e informa.

Antes ne’e, hafoin detekta irregularidade hosi kompañia ne’e, ekipa konjunta deside hodi taka provizóriu produsaun ice cream hosi kompañia CYC Chen Yancai.

Jornalista: Leopoldina De Carvalho