Hatutan.com, (20 Maiu 2024), Díli- Prezidente Repúblika (PR), José Ramos-Horta ho Primeiru-Ministru Kay Rala Xanana Gusmão hamutuk ho membru governu sira simu ho ksolok prezensa Sua Majestade Haji Hassanal Bolkiah, Sultaun Brunei Darussalam ne’ebé too  iha Repúblika Demokrátika Timor-Leste hodi partisipa iha selebrasaun loron Restaurasaun independénsia ba dala-XXII (20 Maiu 2002-20 Maiu 2024).

Lee Mós: Brunei Darussalam Hakarak Servisu Hamutuk iha Área Haat

PR  Ramos-Horta ho PM Xanana Gusmão simu prezensa Sua Majestade Haji Hassanal Bolkiah, Sultaun Brunei Darussalam ne’ebé too iha Repúblika Demokrátika Timor-Leste hodi partisipa iha selebrasaun loron Restaurasaun independénsia bá dala-XXII (20 Maiu 2002-20 Maiu 2024). Foto/Elio dos Santos da Costa

Vizita Estadu ida-ne’e nu’udár vizita dahuluk Sua Majestade Haji Hassanal Bolkiah nian mai Timor-Leste nu’udar konvidadu onoráriu ba iha serimónia komemorasaun Loron Restaurasaun Independénsia Timor-Leste nian ba da-22 ne’ebé hala’o iha Palásiu Prezidensiál Nicolau Lobato, Segunda (20/05/2024).

Iha serimónia ida-ne’e Prezidente Repúblika José Ramos-Horta fó onra Grande Colar orden Timor-Leste nian bá sua Majestade Haji Hassanal Bolkiah, Sultaun Brunei Darussalam, hodi rekoñese nia lideransa no kontribuisaun bá pás no estabilidade rejionál.

Hanesan ema ida-ne’ebé kontribui harii ASEAN, Sultán servisu maka’as hodi konsolida unidade no pás iha rejiaun ne’e.

Ligasaun ne’ebé besik entre Brunei Darussalam no Timor-Leste reforsa liu husi estatutu hamutuk hanesan nasaun ki’ik, nasaun joven iha ASEAN, nune’e mós kooperasaun forte iha indústria mina-rai no gás. Uniaun ida-ne’e hanesan kompromisu mútua bá diversifikasaun ekonómika no determinasaun atu promove kooperasaun substansiál entre nasaun rua ne’e.

Iha komunikadu bá imprensa ne’ebé Hatutan.com asesu husi Gabinete Média Palásiu Prezidensiál Nicolau Lobato,  mensiona Prezidente Ramos-Horta selebra relasaun amizade ne’ebé besik entre nasaun rua, ne’ebé metin liu-husi valór ne’ebé hanesan no esforsu hamutuk atu promove sidadaun sira-nia moris-di’ak.

Xefe Estadu mos louva Majestade Haji Hassanal Bolkiah nu’udár “lider globál ne’ebé di’ak liu” no Brunei Darussalam nu’udar “ezemplu ida bá pás no estabilidade iha mundu ne’ebé nakdoko maka’as”.

“Brunei Darussalam hanesan fatin loloos ba moris iha pás, nu’udár esperansa iha mundu ida ne’ebé hanesan laiha ona esperansa,” deklara Prezidente Repúblika. “Ezemplu ida kona-ba oinsá mak Estadu no Lider sira bele alkansa no lori pás, armónia no hakmatek ba sira-nia povu.” Hateten Prezidente Repúblika José Ramos-Horta.

Prezidente Repúblika, hato’o nia agradesimentu ba Sua Majestade Haji Hassanal Bolkiah nia apoiu ba adezaun Timor-Leste nian ba ASEAN no kompromisu ba progresu jornada no integrasaun rejionál nasaun nian. Nia ko’alia liu kona-ba Brunei nia atinjimentu iha dezenvolvimentu umanu no susesu ekonómiku ne’ebé boot nu’udar modelu ida ba rejiaun ne’e, hodi apela ba kooperasaun ne’ebé boot liu iha setór sira hanesan turizmu, edukasaun, saúde no protesaun ambientál.

Timor-Leste no Brunei Darusalam iha kompromisu atu aproveita oportunidade sira ne’ebé ekonomia Verde no Azúl oferese, hodi aliña an ho kompromisu sira ne’ebé halo ona ba ASEAN no objetivu sira husi COP28.

Hafoin serimónia komemorasaun Loron Nasionál Restaurasaun Independénsia Timor-Leste nian bá dala-XXII, Prezidente Ramos-Horta sei hala’o sorumutuk ho Sua Majestade Haji Hassanal Bolkiah,  nu’udár diskusaun bilaterál hodi kontinua reforsa relasaun, hanoin di’ak no amizade entre nasaun rua ne’e.

Vizita estadu ida-ne’e bele fó-hanoin fali kona-ba buat ne’ebé ita bele alkansa hamutuk no inspirasaun ba futuru ida ne’ebé naroman liu ba Timor-Leste no Brunei Darussalam.

Jornalista: Vito Salvadór