Hatutan.com, (22 Maiu 2024), Díli- Prezidente Repúblika (PR), José Ramos-Horta la preokupa ho kritika husi Bankada Parlamentár FRETILIN nian ne’ebé kestiona nia  diskursu iha serimónia restaurasaun independénsia bá dala-XXII (20 Maiu 2002-20 Maiu 2024) ne’ebé Bankada FRETILIN konsidera la reflete ho povu nia moris.

Lee Mós: FRETILIN Kestiona Diskursu Prezidente Repúblika iha 20 Maiu La Hato’o Realidade Timor-Leste

Xefe Bankada FRETILIN, Aniceto Guterres hala’o enkontru ho Prezidente Repúblika, José Ramos-Horta iha Palásiu Prezidensiál, Sesta (26/05/2023). Foto/Dok.Média PR.

“Ne’e di’ak, ita hein loron seluk, tinan seluk, FRETILIN iha podér mak halo bá diskursu seluk, ha’u halo ha’u nian,” Prezidente Repúblika José Ramos-Horta hateten hodi hatán Hatutan.com  iha Palásiu Prezidensiál, Kuarta (22/05/2024).

Antes ne’e, Xefe Bankada FRETILIN, Aniceto Longuinhos Guterres Lopes, kestiona diskursu Prezidente Repúblika, José Ramos-Horta iha ámbitu komemorasaun loron  restaurasaun independénsia bá dala-XXII (20 Maiu 2002-20 Maiu 2024) tanba la refleta situasaun rai-laran.

Aniceto Guterres  konsidera diskursu Prezidente Repúblika nian ne’e foka liubá hodi simu bainaka Liurai Sultan Brunei Darussalam, Sua Majestade Sultan Haji Hassanal Bolkiah Mu’izzaddin Waddaulah.

Aniceto hateten bainhira nia partisipa iha komemorasaun loron importante ne’e haree no la rona Xefe Estadu  ko’alia netik bá dezenvolvimentu la’o iha rai-laran.

“Ha’u lamenta distintu deputadu, horiseik 20 Maiu, ha’u la rona husi Xefe Estadu Jose Ramos-Horta, mensajen estadu nian kona-bá 20 Maiu ne’e, diskursu iha komemorasaun 20 Maiu ne’e mamuk loos, hanesan diskursu atu simu de’it bainaka,” Aniceto Guterres Lopes iha nia intervensaun iha plenária PN, Tersa (21/05/2024).

Nia afirma diskursu Prezidente Repúblika Jose Ramos-Horta nian la foka bá situasaun rai-laran, tanba hanoin buat hotu la’o di’ak hela, hodi taka falta bá konvidadu espesiál Sultan Brunei Darussalam katak, Timor-Leste nasaun dezenvolvidu ona.

Jornalista: Vito Salvadór