Hatutan.com, (23 Maiu 2024), Díli-Forsa konjunta sira kompostu hosi Polísia Nasional Timor-Leste (PNTL), Departamentu Investigasaun Kriminál (DIK), Departamentu  Informasaun Polísia, ho FALINTIL-Forsa Defeza Timor-Leste (F-FDTL) detein ona suspeitu na’in-rua ne’ebé hadau telefone hodi rezulta Nituchia Fangidae (tinan 7) lakon vida.

Suspeitu na’in-rua iha detein ona iha sela Polísia. Foto/Espesiál

Kronolójia akontesimentu iha Kuarta (22/05/2024),  hale’u tuku 19:50 Otl, sidadaun feto ida ho nia oan Nituchia Fangidae ho motorizada liuhosi área Kampung Alor, hakfodak mai, mosu suspeitu na’in-haat ho motór duni tuir hela sidadaun feto ne’e ho nia oan ho  objetivu atu hadau sira nia telefone ne’ebé sikat hela iha motór inia bolsu oin.

Suspeitu sira konsege hadau sidadaun feto ne’e ninia telefone, nune’e sidadaun feto ne’e duni tuir kedan suspeitu na’in-haat no bainhira duni to’o iha Loja Sehara nian oin, área Praia dos Coqueiros, vítima ne’e tenta hadau hikas nia telefone. Infelizmente, la konsege, tanba  iha suspeitu ida mak ho nia motór halai hosi vítima sira niankotuk, lori ai fai bá vítima nia motór, ikus mai vítima ho ho nia oan feto Nituchia Fangidae ho motor  monu bá espál rezulta sira-nain rua kanek gráve.

Abitante ida haree direta akontesimentu ne’e kontakta kedan bá Ambulánsia hodi evakua  vítima ho nia oan  Nituchia Fangidae bá  Ospitál Nacional Guido Valadáres (HNGV), Bidau-Dili. Biar nune’e, Kinta kalan (23/05/2024), Nituchia Fangidae (7) husik iis  tanba sofre moras ne’ebé gráve. Nune’e, Nituchia Fangidae  nia inan mós hetan kanek todan no dadaun ne’e kontinua hala’o tratamentu bá intensivu iha HNGV.

Iha kalan ne’e kedas, autóridade polisial ne’ebé  asegura no proteje nia sidadaun sira hosi ameasa buka tuir  suspeitu sira nia subar fatin.

Iha Kinta ne’e, hale’u tuku 04:00 madrugada, forsa konjunta sira konsege lokaliza suspeitu sira nia paradeiru to’o kaptura iha Dili laran iha área ne’ebé la hanesan, tanba suspeitu ida kaptura  iha área Matadoro no ida seluk kaptura iha área Bairru Pite, Gang 45.

Hafoin kapturasaun, forda konjunta sira lori kedan suspeitu  na’n-rua bá entrega iha ekipa DIK Nasionál hodi submete bá prosesu identifikasaun no investigasaun kriminál.

“Suspeitu na’in-rua ne’e agora dadaun ekipa konjunta lori ona bá iha Departamentu Investigasaun Kriminál hodi submete bá prosesu identifikasaun,” Hatutan.com sita komunikadu DIK nian.

Suspeitu sira konsidera envolve iha kríme Furtu Agravadu ne’ebé previstu iha artigu 252, Lei Kodigu Penál Timor-Leste. Tanba ne’e, PNTL rejísta kazu ne’e ho NUC 0125/24.PNSIC.

Forsa konjunta sira rekolla mós evidénsia hamutuk lima, iha ne’ebé deskonfia katak, motór hirak ne’e mak durante ne’e suspeitu sira utiliza hodi halo operasaun hadau ema nia telefone ho sasán seluk tán iha kapitál Díli.

Suspeitu na’in-rua ne’e sei detein iha sela detensaun Polísia  durante oras 72 no autus ka evidénsia sira aprezenta hotu ona bá Ministériu Públiku (MP) hodi prosesu kontinuasaun bá Primeiru Interrogatóriu iha Tribunál Judisial Primeira Instánsia Dili (TJPID).

Jornalista: Rogério Pereira Cárceres