Hatutan.com, (28 Maiu 2024), Díli- Prezidente Repúblika (PR), José Ramos-Horta, partisipa ssorumutuk Defeza no Seguransa ba Rejiaun Azia-Pasífiku iha Singapura.

Lee Mós: Prezidente Repúblika Kondekora Embaixadór Brazil Mauricio Medeiros de Assis ho Órdem TL

Prezidente Repúblika (PR), José Ramos-Horta. Foto/Tome da Silva.

Iha komunikadu ba Imprensa ne’ebé Hatutan.com asesu husi Gabinete Média Palásiu Prezidensiál, Tersa (28/05/2024), relata  iha diálogu ne’ebé organiza husi International Institute for Strategic Studies (IISS) Shangri-La ne’e Prezidente Repúblika José Ramos-Horta sei hato’o nia diskursu xave ne’ebé sei aprezenta perspetiva kona-ba tensaun entre podér boot sira no oinsá nasaun sira bele ajuda akalma tensaun liu husi mekanizmu jestaun krize nian..

Diálogu Shangri-La sai nu’udar pilar importante ida ba diplomasia defeza rejionál. Hahú kedas iha tinan 2002, Diálogu IISS Shangri-La  ne’e sai ona forum seguransa ne’ebé importante liu iha Ázia, no sai nu’udar plataforma importante ida atu diskute no rezolve dezafiu rejionál sira. Diálogu tinan ida-ne’e realiza ho kontextu ne’ebé foka liu ba Defeza no Seguransa iha Ázia-Pasífiku.

“Prezidente Ramos-Horta sei hato’o diskursu importante ida iha sorumutuk ne’e hamutuk ho Ferdinand R. Marcos Jr., Prezidente Filipina. Prezidente sei hato’o deklarasaun importante ida kona-ba “Hakbiit Jestaun Krize iha kreximentu kompetisaun” iha loron 1 fulan-juñu. Prezidente sei aprezenta nia perspetiva kona-ba tensaun entre podér boot sira no oinsá nasaun sira bele ajuda akalma tensaun liu husi mekanizmu jestaun krize nian.” Hatutan.com sita komunikadu.

Diálogu Shangri-La, ne’ebé organiza husi International Institute for Strategic Studies (IISS), sai ona forum preeminente ba diskusaun kona-ba asuntu sira seguransa nian iha rejiaun Ázia-Pasífiku. Diálogu iha tinan ida-ne’e realiza iha kontextu intensifika kompetisaun estratéjika no foka liu ba Indo-Pasífiku.

Nasaun hamutuk 40 resin sei partisipa iha simeira tinan ida-ne’e inklui ministru defeza sira, asesor seguransa nasionál sira, xefe militár sira no ofisiál seniór sira.

Durante estadia iha Singapura, Prezidente Ramos-Horta mós sei hasoru malu ho Lideransa Joven sira iha Sudeste Aziátiku, marka prezensa iha resepsaun ministeriál no abertura jantár, no hamutuk ho xefe delegasaun sira seluk iha jantár ne’ebé oferese husi Prezidente Singapura nian.

Prezidente Ramos-Horta no delegasaun sira sei fila hikas mai Díli hafoin Prezidente nia diskursu iha loron 1 fulan-Juñu 2024.

Jornalista: Vito Salvadór