Hatutan.com, (29 Maiu 2024), Díli- Forum ONG Timor-Leste (FONGTIL) husu Governu no autoridade kompetente sira halo investigasaun  didi’ak no kle’an ba  fujitivu Arnolfo “Arnie” Alipit Teves Jr ne’ebé  submete pedidu hakarak hela iha Timor-Leste.

Lee Mós: Fujitivu Arnolfo Teves Jr Haruka Karta Nakloke bá Xanana Husu Salva Nia Vida

Fujitivu Arnolfo Teves Jr. Foto/Wikipedia

“Ita-nia Estadu ratifika ona kuaze konvensaun internasionál barak ne’ebé mak ita halo tiha ona hodi hatudu Timor-Leste ninia aprovasaun ba konvensaun internasionál sira hotu. Entaun, saida mak fujitivu husi Filipina ne’e husu tenke bazeia ba situasaun Timor-Leste ne’ebé mak aprova ona konvensaun sira ne’e. Lei ne’e próteze nia atu nia bele husu atu hetan protesaun iha ita-nia rai no ita-nia Konstituisaun RDTL mós permite ba ida-ne’e. Ha’u hateten tan katak ita presiza kontinua halo investigasaun sira ba fujitivu ne’e ninia situasaun tanbasá mak nia husu ida-ne’e atu nia bele serteza no ita mós bele iha serteza ba ninia kondisaun sira ne’e hodi bele hatene no aseita liuliu ba nia pedidu ne’ebé mak husu  atu kontinua hela iha ita-nia rai tanba nia sente la seguru bainhira nia fila ba nia rai Filipina” Diretór Ezekutivu FONGTIL, Valentim da Costa hateten ba Hatutan.com iha salaun HAK Faról, Díli, Kuarta (29/5/2024).

Membru sosiedade sivíl Timor-Leste ne’e husu ba autoridade sira tenke kontinua investiga atu hatene didi’ak nia intensaun bainhira hela iha Timor-Leste, atu nune’e, públiku labele duvida no labele komplikadu ba relasaun bilateral sira ho Estadu Filipina inklui mós nasaun sira seluk.

Nia husu atu haree didi’ak ba ninia aspetu legal sira no haree nia karta pedidu ne’e tuir lei permite ka lae tanba ne’e tenke investiga hodi hatene nia intensaun loloos hodi labele implika ka estraga Timor-Leste.

Jornalista Estajiáriu :  Lazaro Pereira Quefi