Hatutan.com, (03 Juñu 2024), Díli—Governu Timor-Leste liuhusi Ministru Administrasaun Estatál nu’udár mós vise-koordenadór jerál altu nivel institusionál vizita Papa Francisco nian, Tomás do Rosario Cabral, taka informasaun no konsidera “segeredu” kona-bá prosesu hotu akizisaun bá prodús karreta ne’ebé mak atu tula Papa Francisco durante estadia loron tolu iha Timor-Leste, hahú husi loron 09-11 fulan-Setembru 2024.

Lee Mós: Delegasaun Vatikanu Hahú Halo Inspesaun Fatin ba Vizita Papa Francisco iha Díli

Ministru Administrasaun Estatál (MAE), Tomás do Resoario Cabral. Foto/Elio dos Santos da Costa

Ministru Administrasaun Estatál Tomás Cabral hanesan mós vise-koordenadór jerál altu nivel institusionál vizita Papa Francisco nian mai Timor-Leste hateten, liga ba karreta ne’ebé sei tula Santu Padre daudaun ne’e sei iha prosesu tanba karreta refere sei prodús tuir pedidu husi Vatikanu.

“Karreta ne’e la’ós ba sosa iha fábrika lori de’it mai, ita kumpre hela rekizitu mai husi Vatikanu, ne’ebé karreta ne’e la’o hela sei to’o mai iha rai-laran ho modelu ne’ebé Vatikanu husu,” Ministru Tomás Cabral hateten hodi responde Hatutan.com iha Sekretariadu Vizita Papa Francisco nian iha Motael, Díli, Segunda (03/06/2024).

Razaun governu la fó sai informasaun kona bá karreta tanba iha ligasaun ba seguransa Santu Padre nian. Enkuantu kona-bá  preparasaun iha área saúde husi parte Ministériu Negósiu Estranjeiru no Kooperasaun (MNEK) iha liña koordenasaun ho ekipa sei halo inspesaun ba klínika balun. Mézmu ne’e, Santu Padre Francisco iha médiku rasik mak sei akompaña nia durante nia viajen.

Tomás Cabral esplika vizita Santu Padre nian ne’e hanesan  vizita pastoral no mós  vizita Estadu ida tanba ne’e Governu iha obrigasaun servisu ho igreja Katóliku liu-liu Nunsiatura ba vizita estadu ne’e no mós  Governu nia obrigasaun ba ajuda igreja mobiliza populasaun.

“Kona-bá aluga karreta atu transporta sarani sira husi munisípiu mai Díli, Governu sei hamutuk ho igreja kria kondisaun iha kada parókia hamutuk ho Dioseze hodi organiza sarani sira no bazeia ba Dekretu-Lei ne’ebé fó fleksibilidade ba autoridade munisípiu atu hamutuk apoiu igreja,” Tomás Cabral hateten.

Tuir oráriu iha loron 3 fulan-Juñu ne’e,  ekipa delegasaun Vatikanu sei halo inspesaun ba igreja Katedrál Dili, Palásiu Prezidensiál, Hotél Timor, Hotel Hilton, Aeroportu Internasionál Prezidente Nicolau Lobato, reuniaun ho ekipa DOV, unidade servisu média no komunikasaun.

Jornalista: Leopoldina de Carvalho