Hatutan.com, (21 Juñu 2024), Díli—IX Governu Konstitusionál liuhusi Ministériu Justisa (MJ) sosa ona mákina impresora passaporte unidade rua (2) no oras-ne’e daudaun iha hela prosesu instalasaun sistema.

Lee Mós: Trata Pasaporte iha Fevereiru ho Maiu Seidauk Foti To’o Agora

Ministru Justisa, Sérgio de Jesus Fernandes da Costa Hornai. Foto/Dok

Ministru Justisa, Sérgio de Jesus Fernandes da Costa Hornai atualiza ona novidade ne’e bá Primeiru-Ministru (PM), Kay Rala Xanana Gusmão liu hosi enkontru formál iha Palasíu Governu, Sesta (21/06/2024).

“Kona-bá pasaporte, daudaun ne’e ita iha ona mákina rua ne’ebé ninia prosesu to’o ona iha faze pagamentu. Agora kompañia halo hela instalasaun atu sira bele kompleta tuir sira-nia devér no obrigasaun,” Ministru Justisa,  Sérgio de Jesus Fernandes da Costa Hornai hateten.

Governu kontrata empreza Thales ho ninia sede iha Singapura hodi sosa mákina impresora rua ne’e ho valór orsamentu $330,000.

Ministru Justisa rekoñese katak, durante ne’e tratamentu pasaporte tarde tanba iha duni impresora tolu, maibé rua (2) avaria, no atu bele normaliza lalais atendimentu presiza iha ninia fatin própriu no oras-ne’e halo hela instalasaun atu iha konetividade bá sistema ne’ebé antes ne’e estebelese ona.

Kona-bá estoke kaderneta pasaporte, sei sufisiente hela atu bele hatán bá nesesidade sidadaun sira-nian no Ministériu Justisa halo hela avaliasaun atu haree oinsá hadi’a di’ak liután atendimentu públiku.

Jornalista: Leopoldina de Carvalho