Hatutan.com, (16 Jullu 2024), Dili—Ministériu Ensinu Superiór Siénsia no Kultura (MESSK) sai sasin bá serimónia asina akordu entre ensinu superiór neen ho ONG Internasionál Heavenly Culture, World Peace, Restoration of Light (HWPL) atu estabelese edukasaun pás nian iha Timor-Leste (TL).

Ministériu Ensinu Superiór Siénsia no Kultura (MESSK) sai sain bá serimónia asina akordu entre ensinu superiór neen ho ONG Internasionál Heavenly Culture, World Peace, Restoration of Light (HWPL) atu estabelese edukasaun pás nian iha Timor-Leste (TL), iha salaun konferénsia Ensinu Superiór, Dili, tersa (16/07/2024). Foto: Lázaro Pereira Quefi.

Ensinu Superiór neen ne’e maka, Universidade Orientál Timorosa’e (UNITAL), Institutu Superiór Cristal (ISC), Institutu Politékniku Betano (IPB), Universidade Católika Timorense (UCT) ho Institutu Universitáriu Naroman Esperansa (IUNE).

Lee Mós: KM Aprova Projetu Dekretu-Lei Rejime Jurídiku Estabelesimentu Ensinu Superiór

“Iha fulan hirak liu bá sira konvida ha’u bá partisipa iha sira-nia eventu pás nian iha Korea no ohin Ministériu asina MoU ho sira no mós ho diretór Jerál ensinu superiór inklui universidade neen atu ko’alia kona-bá pás,” Ministru Ensinu Superiór Siénsia no Kultura, José Honório da Costa Pereira Jeronimo hateten iha salaun konferénsia Ensinu Superiór, Dili, tersa (16/07/2024).

Ministru ne’e konsidera pás ne’e importante tebes no tenki kontinua aprende katak pás ne’e tenke hahú hosi edukasaun iha nível ensinu superiór to’o iha kraik, tanba ne’e importante tebes ba Timor-Leste atu eduka-malu liu-liu joven sira atu kria pás iha komunidade nia leet nune’e nasuan bele dezenvolve diak liu tán.

Nia dehan, pás ne’e importante tebes tenki mai hosi familia, mai hosi kada ema, tanba ne’e Ensinu Superiór sei hanoin atu iha futuru tau edukasaun pás nian iha kurrikulu hodi bele hanorin estudante sira iha Ensinu Superiór sira.

Akordu ne’e vale bá tinan 1 depois sei kontinua ho sira tanba HWPL mós hakarak estabelese kurrikulu ida kona-bá pás iha Timor-Leste.

Universidade 6 de’it asina uluk akordu ho HWPL no iha tempu badak universidade sira seluk mós sei asina tán tanba HWPL mai hosi Korea ho nia baze bá edukasaun pás nian iha nasaun 170.

Jornalista Estajiariu: Lázaro Pereira Quefi