Hatutan.com, (16 Jullu 2024), Díli– Parlamentu Nasionál liuhosi Deputadu Bankada FRETILIN, António Calau preokupa ho promesa Governu nian atu fó  indenizasaun bá komunidade afetadu evokasaun husi polítika  Sekretará Estadu asuntu Toponomia  no Urbanizasaun (SEATOU).

Lee Mós: Espasu Ne’ebé SEATOU Sobu Sei Halo Jardín

Governu halo eviksaun forsada bá família sira iha Aitarak-Laran, Díli. Foto/Dok.Tome da Silva

Iha fulan hirak liubá SEATOU halo eviksaun  bá rezidénsia ka uma komunidade nian iha parte área Bidau Sengol, Bidau Santa-Ana, Metiaun, Ai-Tarak Laran, Tasi Tolu, Becora  no seluk tan. Infelizmente, Deputadu António Clau, hateten SEATOU halo eviksaun bá komunidade sira depois foti sira nia konta bankária maibé to’o oras ne’e sira seidauk hetan indimizasaun.

“Ha’u halo konfirmasaun, horisehik, bá komunidade afetadu iha Bidau Sengol,  Bidau Santa-Ana no Metiaut katák sira nian rekening ida-ne’e osan seidauk tama, sira vitíma tiha ona bá evikasaun ne’e rasik,”  Deputadu  António Calau haktuir iha plenária PN, Tersa (16/072024).

Hanesan reprezentante povu, nia preokupa bainhira loos mak komunidade sira ne’e bele hetan indimizasaun no  pelemenus Governu konsidera sira-ne’e, muda sira no dignifika hanesan ema, atu nune’e, sira bele senti katák sira moris iha sira nia nasaun rasik ho dignu.

Reprezentante povu ne’e mós akresenta tán katák  evikasaun bá Tasi-tolu hanesan mós ho planu Governu nian katák foti sira rekening atu hatama osan bá sira nian rekening sira, maibé komunidade sira simu ona notifikasaun katák tempu besik sei hasai sira purvolta 300 itál xefe familia.

Vise-Mnistru Asuntu Parlamentár  Aderito Hugo da Costa, ne’ebé reprezenta Governu iha sesaun plenária PN ne’e esplika, bá despeza administrativa bá komunidade sira ne’ebé afetadu iha Díli hakarak atu hateten katák liuhosi SEATOU hanesan instituisaun estatál planu Governu nian atu haluan espasu públiku sira.

“La’ós promesa de’it maibé,  komunidade afetadu sira husi Ai-tarak Laran, Biadau Sengol, Bidau Santa-Ana, Metiaut no Tasi-tolu sei hetan kompensasaun, agora prosesu ne’e karik seidauk implementa ne’e ha’u sei adianta bá membru Governu sira relevansia atu haree oinsá kompensasaun bá komunidade sira,” Aderito Hugo da Costa hateten.

Jornalista Estajiária: Zita Menezes