Hatutan.com, (29 Outubru 2024), Díli—Embaixada Royal Tailándia iha Timor-Leste fó apoiu sasán esensiál bá feto no labarik sira ne’ebé sai vítima violénsia bazeia bá jéneru.

Lee Mós:  Tailándia Sei Tulun TL iha Área Edukasaun no Agrikultura

Embaixada Tailándia iha Timor-Leste apoiu sasán esensiál sira bá vítima sira violénsia bazeia bá jeneiru, Tersa (29/01/2024. Foto/Leopoldina de Carvalho

Apoiu sira ne’e entrega liuhosi Fundasaun Alola, Tersa (29/10/2024), nu’udár parte ida hodi selebra Loron Memorial ba Liurai Boot Bhumibol Adulyadej no Loron Memorial ba Liurai Boot Chulalongkorn.

Diretora Ezekutiva Fundasaun Alola, Maria Guterres  hateten razaun Fundasaun Alola simu doasaun ne’e tanba  nu’udar organizasaun sosiedade sivíl Timor-Leste nian durante ne’e fornese protesaun, restaurasaun no empoderamentu bá joven feto no labarik sira ne’ebé sai vítima ba violénsia bazeia ba jéneru.

Maria Guterres haktuir hanesan organizasaun la’ós Governu nian ne’ebe tau matan bá feto no labarik feto sira ne’ebé mai ho problema oin-oin, Fundasaun Alola  persija tebes apoiu sira ne’e tanba bele fó bebefisiu ba vitíma sira.

“Kada fulan, Fundasaun Alola  bele rejista vítima asediu seksuál bele to’o na’in-tolu (3) to’o  na’in-hitu (7). Balun mai ho bebe foin moris, balun mai ho bebe ne’ebé idade to’o ona tinan rua (2), ho violénsia tipu oin-oin hanesan kazu abandonadu, violensia domestika, no seluk tan,” Maria Guterres hateten.

Iha biban ne’e Embaixadór Tailándia iha Timor Leste, Atipat Rojanapaibulya, hateten katak apoiu ida-ne’e bazeia mós ba programa estadu no Governu Timor-Leste nian ne’e foka liu programa bá feto no labarik feto sira.

Embaixada Tailándia fó apoiu liu husi organizasaun rua ne’ebé Embaixada Tailándia konsidera hanesan organizasaun ne’ebé servisu bá inan-feto sira ho labarik-feto sira ne’ebé mak sempre sai vítima  violensia bá jeneru, no sasan sira ne’e bele fó nutrisaun bá bebe sira no labarik kiik sira tanba labarik sira mak futuru ba nasaun ida-ne’e.

Dadus husi Fundasaun Alola nian hatudu hahú husi 2023 to’o agora Fundasaun Alola refere ona vítima kuaze 30 ba uma mahon, pradet no mós balun ne’ebe persija apoiu emerjensia ka umanitarian refere bá Ministériu Solidariedade Sosiál no Inkluzaun (MSSI).

Jornalista : Leopoldina de Carvalho