Hatutan.com, (04 Novembru 2024), Díli—Koligasaun partidu CNRT ho PD, Segunda (04/11/2024), halo reuniaun alargada ida iha Centro Conveções Díli (CCD) hodi konsolida ideia sira kona-bá proposta Orsamentu Jerál Estadu (OJE) 2025 ho montante Billaun $2,6.

Lee Mós: Governu Submete Proposta OJE 2025 ho Montante Billaun $2,6 bá Parlamentu Nasionál

Prezidente partidu CNRT nu’udár mós Primeiru-Ministru IX Governu Konstitusionál lidera reuniaun alargada koligasaun partidu CNRT-PD iha CCD, Segunda (04/11/2024). Foto/Espesiál

Reuniaun alargada koligasaun Partidu  CNRT ho Partidu Demokrátiku ne’e partisipa hosi membru IX Governu Konstitusionál no deputadu Bankada Governu iha Parlamentu Nasionál ne’ebé lidera hosi Prezidente Partidu CNRT ho kualidade hanesan Primeiru-Ministru IX Governu Konstitusionál, Kay Rala Xanana Gusmão hamutuk ho Prezidente Partidu Demokrátiku ho kualidade nu’udár Vise-Primeiru-Ministru  Mariano Assanami Sabino Lopes. 

Sita hosi komunikadu imprensa ne’ebé asina hosi Sekretáriu Jerál partidu CNRT, Francisco Kalbuadi Lay ho Sekretáriu Jerál Partidu PD António da Conceição, katak reuniaun konsolidasaun ne’e halo diskusaun naruk no kle’an hodi lori partidu CNRT no Partidu Demokrátiku konkorda ho pontu sira hanesan tuir mai:

1. Partidu CNRT no Partidu Demokrátiku konkorda atu foku liubákualidade ezekusaun, la’ós hare de’it bá taxa ezekusaun;
2. Partidu CNRT no Partidu Demokrátiku sei kontínua tau ba prátika slogan katak partidu-rua ne’e forma Governu la’ós atu ukun maibé atu serbí, nune’e sei kontinua mantein servisu di’ak ne’ebé atinje ona iha 2024 no hadi’ak liutan servisu balun iha 2025;
3. Partidu CNRT no Partidu Demokrátiku sei kontinua aloka osan no implementa programa sira iha setor produtivu no setor estratéjiku sira, atu nune’e, nafatin garante estadu nia sustentabilidade fiskal iha futuru;
4. Partidu CNRT no Partidu Demokrátiku konkorda atu aloka osan iha kapital dezenvolvimentu ba Projetu Tasi Mane atu reativa prosesu preparasaun ba Greater Sunrise ne’ebe iha governu liuba lafo importánsia no atensaun;
5. Konsidera mós prosesu burokrasia ne’ebé naruk iha jinastíka aprovizionamentu nian nune’e impede aselerasaun de ezekusaun kategoria orsamentu iha kapital dezenvolvimentu nian, Partidu CNRT no Partidu Demokrátiku sei reforma sistema aprovizionamentu hodi aselera dezenvolvimentu ba povu.
6. Partidu CNRT no Partidu Demokrátiku sei kumpre kompromisu eleitoral atu hadi’ak erru sira ne’ebe akontese iha Governu liuba, tanba ne’e sei fo apoiu masimu ba prosesu auditoria husi auditor internasional ne’ebe la’o daudauk ona;
7. Partidu CNRT no Partidu Demokratiku konkorda atu investe liután iha Rekursu Umanu setor judisiária nian atu reforma no hadi’ak setor refere hodi harii sosiedade ne’ebe justu iha kurtu no longu prazu.

Ikus liu, Partidu CNRT no Partidu Demokrátiku konsidera 2025 nu’udár tinan bá implementasaun kompromisu IX Governu Konstitusionál, tanba tinan 2024 konsentra liubá esforsu sira atu hatuur hikas sistema finanseira ne’ebé partidu rua ne’e konsidera naksobu, kurrije erru sira, no halo auditória nune’e asegura katak povu nia osan tenke jere ho di’ak.

Jornalista: Rogério Pereira Cárceres