Hatutan.com, (09 Dezembru 2024), Liquiça– Conselho de Imprensa de Timor-Leste (CI) servisu hamutuk ho  parseiru UNDP fasilita formasaun  Jornalizmu Ambientál bá jornalista Timoroan hamutuk na’in-30 .

Lee Mós: Jornalista Timoroan Sira Partisipa Formasaun Jornalizmu bá Pás

Jornalista reformadu Média TEMPO Indonézia, Untung Widyanto fó formasaun ba jornalista Timoroan na’in-30 iha Liquiça, 09 Dezembru 2024. Foto/Alberico Junior da Costa

Formasaun ne’ebé hala’o iha Munisípiu Liquiça ne’e durante loron-tolu (3) hahú hosi loron 09 to’o loron 11 fulan-Dezembru 2024, hodi lori mós formador hosi jornalista reformadu hosi Média TEMPO Indonézia, Untung Widyanto.   Nia iha koñesementu di’ak tebes kona-bá kobertura asuntu ambiente no eskritór  livru ho titulu “Membangun Peradaban Dunia-Samburat Asa Dalam Revitalisasi Taman Ismail Marjuki Jakarta“. 

Prezidente Konsellu Imprensa Otelio Oté espera katák formasaun ida ne’e bele eleva koñesimentu foun iha espiritu foun atu sai ajente importante iha transformasaun informasaun bá públiku iha mundu jornalizmu.

“Ita espera katák sira sei sai duni transformadór karakter bá ita-nia populasaun sira atu hetan siénsia katák asuntu ambiénte importante tebes atu ita tau matan tanba ne’e liga bá ema hotu nia vida,” Otelio Oté  hateten.

“CI presiza organiza nafatin formasaun sira-ne’e bá jornalista timoroan sira iha área hotu-hotu, ida-ne’e sei kontinua bá oin no ita sei halo monitoring bá partisipante sira bá produsaun notisia liga bá ambiénte nian, nune’e ita hatene progresu mudansa konteudu jornalistiku liuliu kona-bá ambiénte,” Ote tenik.

Iha sorin Embaixadór Japaun iha Timor-Leste, Tetsuva Kimura haksolok tebes  asiste serimónia lansamentu bá formasaun Jornalizmu Ambientál bá jornalista sira ne’ebé organiza hosi Konsellu Imprensa no apoiu hosi Embaixada Japaun iha Timor-Leste ho UNDP.

Jornalista reformadu Média TEMPO Indonézia, Untung Widyanto fó formasaun ba jornalista Timoroan na’in-30 iha Liquiça, 09 Dezembru 2024. Foto/Alberico Junior da Costa

Nia hateten jornalizmu hamriik iha demokrasia nia fuan. Liuhosi média mak sidadaun sira hetan informasaun, debate sira hetan estimulasaun, no tane-aas responsabilidade demokrátiku. Relasionadu ho ida-ne’e, Governu Japaun rekoñese ona importánsia atu hametin setór média no fó apoiu kle’ur ona bá dezenvolvimentu jornalizmu iha Timor-Leste.

“Bá jornalista sira ne’ebé ohin halibur hamutuk iha ne’e, ha’u hein katák imi sei aproveita didi’ak oportunidade ida-ne’e hodi habelar imi-nia koñesimentu, haluan imi-nia rede profisionál sira, no dezenvolve abilidade ne’ebé presiza atu fornese jornalizmu ho kualidade, tanba imi mak arkitetu diskursu públiku no demokrasia nian,” Embaixadór Tetsuva Kimura tenik.

Reprezentante UNDP Muhammad Jaffar apresia ho servisu hamutuk ho parseiru sira hodi realiza atividade ida-ne’e no espera  katák liuhosi treinamentu ida-ne’e jornalista sira bele promove sira nian kapasidade kona-bá ambiénte nian.

 Jornalista Estajiária: Zita Menezes