Hatutan.com, (09 Dezembru 2024), Díli—Membru Parlamentu Nasionál hosi Bankada FRETILIN (opozisaun iha PN), David Dias Ximenes “Mandati” preokupa ho atividade negósiu iha territóriu nasionál tanba domina husi negosiante sira hosi Xinés.

Lee Mós: Emprezáriu Xinés iha TL 15,000 no Absorve Kampu Servisu bá Timoroan 20,000

Ambiente loja Xinés sira-nian iha Kampung Baru Comoro, Díli. Foto/Hatutan.com.

Deputadu David Mandati Ximenes fó hanoin katak  bainhira governu la kontrola hodi kria lei regula negosiante Xinés sira ne’e, sei fó impaktu ba povu ki’ik sira tanba labele kompete ho Xinés sira hodi buka moris liu husi fa’an-sasán.

“Xinés sira halo negósiu iha Timor ne’e demais liu ona, favór ida ita boot sira haree tok lei ka haree tok saida mak bele halo para bele pelu menus iha populasaun nia leet ne’e sira labele tama ba halo tan loja iha ne’ebá, tanba hanesan ne’e ita-nia maluk oan sira halo kioske ne’e bankarrota,” David Dias Ximenes “ Mandati” hateten iha plenária PN, Segunda (09/12/2024).

Deputadu bankada opozisaun ne’e mós  haktuir katak tuir rezultadu fiskalizasaun  hatudu negosiante Xinés sira ne’e la’ós de’it halo negósiu iha kapital, maibé to’o ona iha área rural.

“Ha’u nia rai Ermera komesa tama ona, lahatene mane-foun ne’e Xina fali ona ka  mane-foun ne’e Bangladés ka India fali ona, ne’ebe ha’u haree favór ida ita halo lei ida ka buat atu ministériu komérsiu no indústria  tau regra ida ema labele ba tan, se lae oho ita-nia maluk sira,” David “ Mandati”  hateten.

Membru PN hosi Bankada CNRT, Natalino dos Santos mós husu ba AIFAESA atu halo kontrolu ba sasán no produtu sira ne’e fa’an iha loja Xinés tanba laiha kualidade.

“Ha’u husu governu  atu haree lei investimentu, no lei auxiliu  Migrasaun atu bele define, liu-liu ha’u haree AFAESA atu kontrola didi’ak sasán sira ne’e tanba sasán brinkedu laiha kualidade,” Deputaud Natalino dos Santos hateten.

Hatán ba intervensaun husi membru PN sira-ne’e, reprezentante Governu ne’ebé partisipa iha plenária PN,  Sekretáriu Estadu Komunikasaun  Sosiál nu’udár Vise-Munistru Interniu ba asuntu Parlamentá, Expedito  Dias Ximenes,  apresia ho intervensaun husi deputadu sira ne’ebé liga ho situasaun  saúde, ekonomia, eduksaun. Nia parte sei  anota intervensaun hirak  ne’e no sei hato’o ba ministériu relevante .

 Jornalista: Leopoldina de Carvalho