Hatutan.com (31 Janeiru 2025), Díli– Delegasaun Korrida Pás sei viita Timor-Leste iha loron 04 fulan-Fevereiru 2025 hodi lori mensajen pás no dame bá estudante no joven sira.

Lee Mós: Ministériu Edukasaun Sei Konstrui Sala Aula 1050

Ministra Edukasaun Dulse de Jesus. Foto/Tome da Silva

“Enkontru badak ida ho Prezidente Parlamentu Nasionál, Maria Fernanda Lay, ko’alia kona-bá preparasaun vizita delegasaun korrida  pás iha relasaun ho estatua Sri Chinmoy iha ne’e no kada tinan sira mai vizita Timor-Leste,” Ministra Edukasaun Dulse de Jesus bá jornalista sira hafoin halo enkontru ho PPN Maria Fernanda Lay iha PN, Sesta (31/01/2025).

Ministra Edukasaun  afirma delegasaun sira ne’e sei  mai halo sira nian atividade pás hamutuk ho lider,  estudante sira no mós joven sira.

Delegasaun sira-ne’e sei halo mós atividade oinsá mak halo mensajen pás ho estudante sira iha Munisípiu Liquiça iha eskola rua no mós ho eskola lima iha Munisípiu Díli.

“Di’ak bá ita tanba sira lori mensajen pás nian mai joven no estudante sira s mai kompostu husi membru delegasaun purvolta ema na’in-13 no sira mai husi nasaun oin-oin,” Ministra Dulce de Jesus informa.

Iha loro-kraik 04 fulan-Fevereiru,  sei iha atividade hamutuk ho Prezidente Parlamentu Nasionál Maria Fernanda Lay karik mós iha prezensa husi Primeiru-Ministru Kay Rala Xanana Gusmão no Prezidente Repúblika José Ramos-Horta hamutuk ho estudante sira no mós membru Governu sira hotu.

Iha loron  07 fulan-Fevereiru, sei iha korrida  pás purvolta  kilómetru lima (5) hahú husi estátua Sri Chinmoy no sei termina ka finish iha Palásiu Governu.

Jornalista Estajiária: Zita Menezes