Hatutan.com, (06 Fevereiru 2025), Díli- Ministériu Edukasaun (ME) sei servisu hamutuk ho Komisaun Funsaun Públiku (CFP-portugés), hodi oferese Teste Espesiál ba Eis-Profesór kontratadu sira tinan 2023 ne’ebé prienxe rekizitu atu sai profesór iha futuru.

Lee Mós: Rezolusaun PN Kona-bá Kestaun Eis-Profesór Kontratadu 2023 Aprova ho Unanimidade

Profesóra kontratadu ida kumu-liman metin kontra desizaun Ministra Eduksaun, Dulce de Jesus tanba Governu la estende sira-nai kontratu. Foto/Dok

Komunikadu ba Imprensa ne’ebé Hatutan.com asesu husi Ministériu Edukasaun, Kinta (06/02/2025), informa hafoin Ministra  Edukasaun (ME), Dulce de Jesus Soares halo tiha diálogu ho reprezentante Eis-Profesór Kontratadu (EKP) sira 2023, Segunda (03/02/2025),  konsidera ba regra sira ne’ebé hatuur iha Dekretu-Lei 31/2023 de 31 de Maiu no mós kondisaun sira balun, ME hakarak re-afirma desizaun ME nian kona-ba pasu sira atu solusiona problema EPK 2023 ne’ebe mak la’o ona  durante tinan ida resin hanesan tuir mai:

• ME sei servisu hamutuk ho CFP oferese Teste Espesiál ba EKP 2023 ne’ebe prienxe rekizitu atu sai profesór iha futuru;
• Teste Espesiál nia sentidu katak teste ne’e oferese de’it ba grupu EPK 2023;
• ME sei tetu hodi fó solusaun tuir regra ba estatutu EPK 2023 ne’ebe la prienxe rekizitu tuir teste espesiál tamba sira ho de’it diploma sekundária;
• Solusaun sira ba problema EPK 2023 sei halo fazeadamente, sei hala’o uluk teste espesiál no ikus sei fó solusaun ba EPK 2023 ne’ebe mak ho de’it diploma sekundária;

Husi biban ne’e, ME mós hakarak esklarese katak liga ho teste espesiál ba EPK 2023 sei hala’o ho pasu sira hanesan tuir mai:

• EPK 2023 sei hala’o teste dahuluk, hafoin loke teste jerál ba Bolsa Kandidatu Profesór;
• ME sei fasilita matríz (kisi-kisi) ba EPK 2023 atu estuda, prepara aan antes tuir teste. Matríz nu’udár matéria jerál ba teste espesiál nian. Espera katak ho preparasaun ne’ebe di’ak EPK 2023 sira sei hetan mos rezultadu di’ak iha teste;
• Teste espesiál sei hahú halo ba ESG-Tec-Voc, hafoin teste ba nivel Ensinu Baziku bazeia ba nesesidades;
• Hakarak mos informa, iha teste Bolsa Kandidatu profesóra sira iha tinan kotuk ne’ebe halo dala rua ona, iha EPK 2023 porvolta 200-liu mak passa iha teste sira refere. ME hakarak enkoraja ba EPK 2023 ne’ebe seidauk hola parte iha teste sira iha tinan kotuk, 2023 atu bele uza oportunidade di’ak iha teste espesiál, atu nune’e, hotu-hotu bele kontribui ba edukasaun ida ho kualidade ba Timoroan ka jerasaun sira iha futuru Timor nian.

Jornalista : Vito Salvadór