Hatutan.com, (24 Fevereiru 2025), Díli—embaixadora Estadus Unidus Amérika (EUA), Donna Ann Welton konklui ona nia mandatu nu’udar Embaixadora Estadus Unidus Amérika iha Timor-Leste, hodi ba reforma antesipada hafoin hala’o karreira kleur no di’ak tebes iha funsaun públika.

Lee Mós: Prezidente Repúblika Simu Kredensial husi Embaixadóra EUA Donna Ann Welton

Embaixadora Estadus Unidus Amérika (EUA) mai Timor-Leste, Donna Ann Welton hasoru malu Premiadu Anti-Korrupsaun Mundiál 2023, Francisco Belo Simões da Costa, iha Embaixada Estadus Unidus Amérika nian iha Díli, 21 Agostu 2024. Foto/Dok.Vito Salvadór

Komunikadu Imprensa ne’ebé Hatutan.com asesu hosi Embaixada EUA nian iha Díli, Segunda (24/02/2025), informa katak Vise-Xefe Misaun Marc A. Weinstock asume ona lideransa Misaun nian nu’udar Enkarregadu Negósius.

Konfirmada ba dahuluk husi Kongresu Estadus Unidus Amérika iha loron 07 Maiu 2024 hodi hala’o kna’ar iha Timor-Leste, Embaixadora Welton aprezenta formalmente ninia karta kredensiál ba Prezidente Timor-Leste iha loron 16  fulan-Jullu 2024.

Durante ninia tempu tomak iha país, Embaixadora ne’e sempre tane aas Estadus Unidus Amérika no Timor-Leste ninia relasaun bilaterál. Ninia kompromisu formál hirak-ne’ebé iha haburas liután lasu diplomátiku ne’ebé metin tebes bazeia ba respeitu malu no parseria profunda entre nasaun rua ne’e. Liuliu, Embaixadora ne’e profisionalmente no pesoalmente dedikadu tebes ba dezenvolve entendimentu ida ne’ebé kle’an liután kona-ba povu Timor-Leste, ne’ebé inklui ninia dedikasaun ba aprende dalen Tetun.

Embaixadora Welton halo ona viajen hodi vizita munisípiu 13 ne’e hotu – ho aviaun Cessna, karreta bo’ot, no mós ró alugadu.

Durante viajen hirak-ne’e, nia hasai ninia binókulu hodi apresia Timor-Leste nia populasaun, manu-fuik estraordináriu sira, luku iha tasi, no halo ligasaun metin liután ho povu Timor-Leste, hahú husi Prezidente no Primeiru-Ministru to’o líder komunitáriu sira, ferik-katuas sira, no alunu labarik sira iha eskola rurál sira ho objetivu dezenvolve komprensaun di’ak ida kona-ba povu Timor-Leste nia nesesidade no oinsá Estadus Unidus Amérika bele apoia ho di’ak liután kontinente Ázia nia demokrasia foun liu ne’e.

Embaixadora lori Estadus Unidus Amérika besik liután ba Timor-Leste – porezemplu, nia vizita ona uma-lulik ne’ebé maka dokumenta liuhusi subvensaun ida Estadus Unidus nian, fasilita kolaborasaun entre Ministériu Defeza no Guarda Nasionál Rhode Island hodi eleva kooperasaun seguransa, loke nia uma ba hametin rede servisu ho líder foin-sa’e sira, no lansa Inkubadór Negósiu foun ida hodi hakbi’it foins-a’e Timoroan sira ho abilidade ne’ebé presiza atu hetan empregu di’ak,  loke negósiu foun sira, no kontribui ba nasaun ne’e nia kreximentu ekonómiku iha tinan hirak ba oin. Legadu ne’ebé maka Embaixadora Welton husik hela sei iha impaktu ba tinan hirak tuirmai.

Ninia servisu iha Timor-Leste mak sai hanesan Embaixadora Welton nia destakamentu servisu ikus nu’udár diplomata ida Estadus Unidus Amérika nian molok reforma.

Jornalista: Vito Salvadór