Hatutan.com, (04 Marsu 2025), Oé-Cusse– Prezidente Repúblika José Ramos-Horta,  Tersa  (04/03/2025), halo Vizita ba sentru “GREEND HOUSE DAPUR PREZIDENTE BA LABARIK” iha Aldeia Oe-molo,  Suku Lifau, Sub Rejiaun Pante Makasar, Rejiaun Administrativu Espesiál Oé-cusse Ambeno (RAEOA).

Lee Mós: Governu Aprova Planu Anuál Multisetoriál Nasionál bá Kombate Stunting

Prezidente Repúblika, José Ramos-Horta hala’o vizita traballu ba Oé-Cusse, Tersa (04/03/2025). Foto/Supply

Iha vizita servisu ne’e,  Xefe Estadu husu ba lider igreja, autoridade lokál sira atu kontinua programa ne’e tanba Oé-Cusse sub nutrisaun infantíl aas tebes ne’ebe nafatin fó han labarik sira no loron ruma bele tulun ferik ho katuas ne’ebé hela besik atu hetan ai-han nutritivu loron-loron.

Programa Prezidénsia nian ne’ebé tulun kosok-oan no inan sira atu hetan hahán ruma ho nutrisaun ne’ebe hahú kedas iha fulan-Dezembru 2023 iha Dili iha fatin haat kuaze ema total 700 resin sira kada loron hahú hosi segunda to’o sesta  hetan hahán ne’ebe nutritivu hanesan etu, modo, manu-tolun, iha loron ida bele han na’an-manu, loron ida bele han na’an-karau ho Naan sira seluk tan maibé labarik sira fase uluk liman molok han.

“Oé-Cusse sub nutrisaun infantil aas tebes hanesan Viquequ ho  Ermera entaun kooperasaun hanesan Madre sira, Pároku iha ne’e ho autoridade sira hanesan RAEOA loke tan programa iha ne’e agora aumenta ba beibeik. Ha’u hateten ona labele taka iha tinan ruma, apa ruma, inan ferik ruma ka ema ho defisiénsia sira ne’ebe hela besik hakarak mai han bele mai han tanba la iha lei ida atu limite ba kraik ka ba leten,” Prezidente José Ramos-Horta hateten.

Prezidente Repúblika halo atividade lubuk ona iha Timor-Leste hanesan halo uma ba ema lubuk ida ona, kioske, ajuda inan sira halo negósiu,  halo treinamentu ba sira no fó osan atu aumenta sira nia kioske  no mestre balu husu ajuda atu hadi’a eskola husu de’it kalén, no balun husu atu halo eskola tomak ida ka Eskola kompletu nune’e iha fatin ne’ebé de’it Prezidente ajuda ona.

Bainhira iha ema kiak barak ne’e Prezidente Repúblika fó ajuda tanba ne’e orsamentu prezidénsia nian dezde simu pose nunka autoriza atu sosa karreta foun ba asesor sira mós karreta foun la iha tanba ne’e uza karreta anterior sira portantu halo viajen mós apezar ema na’in-rua ka tolu mak akompaña de’it nune’e mós hela iha kuartu ida simples liu no baratu liu lakohi hela iha otél  fitun lima sira ne’ebe karun liu maibé iha mundu Prezidente kuandu halo viajen sempre lori ema na’in-50 to’o na’in-100 tanba ne’e hanesan Prezidente hakarak poupa osan atu tulun ema kiak sira iha Timor-Leste.

Jornalista Estajiáriu : Lazaro Pereira Quefi