Hatutan.com, (16 Abríl 2025), Díli -Plenária extraordináriu Parlamentu Nasionál, Kuarta  (16/04/2025), aprová votasaun jeneralidade espesifikú no final global  bá proposta alterasaun lei PPL nú.16/VI (2a), segundu alterasaun nú.25/2021 Dezembru, lei organizasaun judisiáriu  ho rezultadu votasaun a-favór 39, kontra 18 no abstensaun  ida (1). 

Lee Mós: Troka PTR Deolindo dos Santos, Governu Sei Revoga Lei Organizasaun Judisiáriu

Plenária Parlamentu Nasionál. Foto/Dok.Tome da Silva

Membru Bankada FRETILIN, Nurima Ribeiro Alkatiri iha faze diskusaun  jeneralidade, espesifiku no final global haktuir proposta alterasaun ba lei organizasaun judisiáriu ida-ne’e la hatudu objetivu atu hadia funsionamentu justisa nian ka atu reforsa nia efikásia, maibé hatudu nia tentativa klaru no gravé podér ezekutivu iha interfere estrutura no funsionamentu podér judisiáriu nian.

“Ne’e loke dalan bá nomeasaun figura ida  ne’ebé aliniadu ho Governu nian polítika, órgaun másimu estrutura judisiál nia oin, ita nian konstitusaun konsagra prinsipíu separasaun podér no atribui bá Tribunál nu’udár orgaun soberanu misaun atu halo administrasaun Justisa hodi povu nia naran ho maneira imparsiál, independente no livre husi insedensia no interferénsia,” Deputada Nurima Ribeiro Alkatiri fundamenta  iha Plenária, Kuarta (16/04/2025).

Iha sorin seluk Xefe Bankada PD, Deputadu Manuel Henrique Noronha apresia tebes bá alterasaun lei organizasaun judisiáriu lei ida-ne’e tama iha jeneralidade no espesifiku apoiu bá alterasaun ida-ne’e hodi bele kria normál espesifiku ida hodi fó podér tomak bá Prezidente Repúblika hodi halo nomeasaun bá Prezidente Tribunál Rekursu (PTR).

“Ita hotu-hotu hatene katak ita nian nasaun ne’e ita iha ai-riin haat, no agora dadaun mandatu Prezidente Tribunál Rekursu hela de’it fulan ida atu hapara, ne’ebé hakarak lakohi ita tenke fó podér no kompeténsia bá Prezidente Repúblika hodi halo nomeasaun bá Prezidente Tribunál Rekursu foun,” Deputadu Manuel Noronha afirma.

Iha fatin hanesan Ministru  Justisa Sergio Hornai iha Parlamentu Nasionál hateten depois akompañia Deputadu sira nia intervensaun ida-idak, nia reinteira katák presiza duni hases tiha sata  netik ne’ebé lei nu.12/2022 nomós lei 25/2021 hateten mós iha ne’ebá lei ne’e afirma katák Prezidente Repúblika só bele halo nomeasaun bá iha Presidente Tribunál Supremu.

“Gosta la gosta hakarak ka lakohi Governu presiza halo redifinisaun ida ho loloos para atu asentura ninian polítika lejislatura bá iha makina sira ne’ebé mak atu mai daudaun, hodi nune’e fó fatin bá iha Presidente Repúblika la haree de’it bá artigu sira ne’ebé mak temi iha konstitusaun Repúblika, maibé haree iha norma vijente ka aplikante ne’ebé sai hanoin ida taka hela dalan purenkuantu ita nian Tribunál Supremu ne’ebé ita atu estabelese seidauk instala,” Ministru Justisa Sergio Hornai hateten.

Jornalista Estajiária : Zita Menezes