Hatutan.com, (17 Juñu 2025), Díli–IX Governu Konstitusionál lidera hosi Primeiru-Ministru Kay Rala Xanana Gusmão, kontinua koordena ho Parlamentu Nasionál, atu aselera asuntu legál sira ne’ebé nesessáriu hodi kompleta rekizitu sira kona-bá Timor-Leste  nia adezaun totál hanesan membru plenu ba Association of Southeast Asian Nations ka ASEAN iha fulan-Outubru 2025.

Lee Mós: Timor-Leste Halo Preparasaun Intensivu Adezaun Bá ASEAN

PM Xanana relata informasaun ba jornalista sira hafoin hasoru malu ho Prezidente Parlamentu Nasionál. Maria Fernanda Lay iha PN, Tersa (17/06/2025). Foto/Zita Menezes

Koordenasaun ne’e liu-hosi enkontru entre PM Xanana Gusmão ho Prezidente Parlamentu Nasionál, Maria Fernanda Lay, iha Parlamentu Nasionál, Tersa (17/06/2025). Primeiru-Ministru Kay Rala Xanana Gusmão lori ona dokumentu sira ba Parlamentu Nasionál no  husu Prezidente Parlamentu Nasionál Maria Fernanda Lay atu dehan bá Bankada Parlamentár sira katak preparasaun bá ASEAN buat importante ida maka Lei hodi aprova nune’e bele tama ba membru plenu ASEAN.

Antes ne’e, Primieru-Ministru Xanana Gusmão tranzmite  ba membru Governu no entidade hotu iha reuniaun koordenasaun interministeriál katak iha Simeira ASEAN bá dala-46 iha Kuala Lumpur ezije bá Timor-Leste atu kumpri pasu sira prosessuál nesessáriu bá adezaun no atu aselera negosiasaun sira kona-bá akordu ekonómiku essensiál sira. 

Jornalista: Zita Menezes