Hatutan.com, (01 Jullu 2025) Díli– Na-in ba rai ne’ebé afetadu husi projetu konstrusaun Kuartél Jerál  Polísia Nasionál Timor-Leste (PNTL) hakarak forma kompensasaun uma troka uma no rai troka rai.

Lee Mós: Konstrusaun Kuartél Jerál PNTL Sei iha Faze Negosiasaun ho Uma-Kain Haat Nu’udár Na’in Bá Rai

Ekipa sira halo levantamentu ba uma ho rai ne’ebé afetadu ba projetu konstrusaun Kuartél Jerál PNTL, Kuarta (01/07/2025). Foto/Juvinal Cabral dos Santos

Carlos Nunes Pereira, abitante Aldeia 01 Sentru  Unidade, Suku Caicoli, Postu-Administrativu Vera Kruz, Munisipiu Dili,  nu’udár  afetadu ba projetu alargamentu Kuartel Jeral PNTL rezeita simu indenizasaun osan, maibé husu parte kompetente sira atu utiliza forma kompensasaun rai troka ho rai no uma troka ho uma.

“Ami nia hakarak ne’e rai troka rai, uma ne’e di’ak hela tanba rai iha mak halo uma iha leten, osan ne’e ita la halo buat ida ne’e mak ami na’in-haat nia hanoin, tanba ami moris ran fakar iha ne’e to’o agora depois eransa ávo nian ,nune’e ami hakarak rai troka rai-luan no naruk hanesan,” Carlos Nunes Pereira hateten bainhira akompaña ekipa levantamentu dadus afetadu sira ba projetu konstrusaun Kuartél Jerál PNTL, Tersa (01/07/2025).

Komunidade afetadu uma-kain haat ne’ebé sai hanesan na’in ba rai eransa ne’ebé afetadu husi projetu alargamentu Kuartél Jerál PNTL la’ós rejeita dezenvolvimentu no prontu koopera ho Estadu, mas sira-nia hakarak mak  Estadu bele hatudu fali rai ho medida hanesan no halo kedas uma ba leten atu sira bele muda ba.

Iha fatin hanesan Advogadu Rede ba Rai, Julio da Silva hateten, levantamentu dadus ida ne’e akontese tanba proposta  mai husi afetadu sira rasik, katak presiza atualiza dadus sira tanba dadus ida uluk parte governu foti ne’e iha tinan 10 liubá, entaun dadus sira ne’e la relevante ona ka la korespodente ona ho situasaun atuál.

Advogadu esplika iha mudansa ba fatin afetadu alargamentu Kuartel Jeral PNTL nian tanba ida-ne’e mak husu atu atualizasaun dadus tanba konstrusaun sira mudansa iha rai nia laran ne’e kuaje iha mudansa lubuk ida entaun presiza iha dadus foun.

Preukupsaun ne’ebé durante nia akompaña komunidade afetadu sira nia hakarak mak rai. Katak Governu presiza rai ne’e mak problema tanba indeminizasaun ne’e sira lakohi tanba sira la iha kapasidade jere osan loron ruma osan sei mohu sai mukit liu ida ne’e mak komunidade afetadu sira nia preukupsaun.

Komunidade afetadu alargamentu Kuartel Jeral sira husu nafatin governu tenke konsidera sira nia rai ne’e troka fali ho rai seluk ida ne’e mak faze negosiasaun  sei halo hamutuk ho governu, Rai ne’ebé ohin ita atualiza ne’e kuaze 6,033 metru kuadradu.

Jornalista: Juvinal Cabral dos Santos