Hatutan.com, (14 Jullu 2025), Díli– Komisaun Anti Korrupsaun (CAC-sigla portugés) dadaun ne’e  halo hela anazlizé bá dokumentu hotu ne’ebé submete husi Autoridade Portuáriu Timor-Leste, Institutu Públiku (APORTIL,I.P) kona-bá  prosesu konkursu públiku ka tenderizsaun manutensaun Ró Berlin Nakroma ho kustu $786,000.00.

Lee Mós: Auditoria Bá Ró Berlin Nakroma iha Ona Ministru Miguel Manetelu no Presiza Investigasaun Kle’an

Ró Berlin Nakroma atraka fali iha Portu Díli hafoin besik fulan-haat halo manutensaun iha Surabaya-Indonézia. Foto/Dok

Diretór Investigasaun Kriminal CAC, José Verdial, Segunda (14/07/2025),  bá Hatutun.com   liuhosi komunikasaun telefonika hateten, parte  APORTIL, I.P submete ona dokumentu hotu prosesu konkursu públiku ka tenderizasaun ba manutensaun Ró Berlin no  ekipa CAC nian sei avalia no halo daudaun análize ba dokumentu sira-ne’e.

Nia hateten parte CAC sei lee dokumentu sira-ne’e ho kuidadu oinsá  atu deteta buat ruma, nune’e ekipa investigador foin  avalia hela dokumentu sira ne’e para depois halo  anazlizé molok halo  konluzaun ruma.

Diretor Investigador ne’e dehan, tanba iha ona  prosesu averiguasan, relasiona ho preokupasaun no lamentasaun públiku, maka CAC halibur ona dokumentu hodi halo análize hodi bele foti konkluzaun ruma.

Fó hanoin fali katak Prezidente Autoridade Portuáriu Timor-Leste, Institutu Públiku (APORTIL,I.P), José de Oliveira Leão, informa nia parte submete hotu ona dokumentu tenderizasaun kona-bá manutensaun Ró Berlin Nakroma ho kustu US$786,000.00 ba CAC.

Iha Tersa,  24 fulan-Juñu, tinan ne’e,  José de Oliveira Leão, klarifika katak manutensaun Ró Berlin Nakroma ho total kustu manutensaun$786,000.00 la’ós ba Ró Berlin Nakroma de’it, maibé inklui spare part Ró Ramelau nian.

“Ha’u klarifika kustu manutensaun $786,000.00 ne’e la’ós ba manutensaun de’it, maibe tama mósspare part Ró Ramelau no Ró Nakroma nian  tama hotu iha orsamentu ida-ne’e. Ne’e mak públiku seidauk hatene,” José Leão hateten.

Prezidente APORTIL esplika  kona-ba manutensaun Ró ba tinan ida ne’e ho tinan sira liubá ne’e, sira mai iha APORTIL iha tinan kotuk  fulan-Abril no fulan-Maiu Ró para Novembru mak sira foin haruka Ró sai ba tanba problema ida iha mákina parte loos bee tama ona iha mákina nia laran Ró para labele halai ida-ne’e mak sira halo fali jestaun hodi haruka fali ba Doka iha Indonézia

“Ami konsellu foun ami la hanoin atu fahe item-rua (2) ne’e ba kompaña-rua (2), maibé item ne’e ba kompaña ida de’it ne’e mak nia sai presu total husi manutensaun Ró ne’e loloos ne’e nia sai US$720,000.00 de’it, maibé ami mós hatama tan ba iha sertifikasaun nian, ba iha Eskritóriu Klasifikasaun Indonézia nian  (BKI/ Biro Klasifikasi Indonesia), ba iha  survey, ba stataory ho mós kustu ba DNTM ne’e mak sai total US$786,000.00, ha’u hakarak esplika tan ha’u iha dokumentu rua  ne’e mak ami tau hamutuk sai ba ida, klaru ema la bele nota hanesan ami halo tanba uluk sira halo fahe tiha ba  rua (2) ema hatene mak ko’alia ida kiik de’it, maibé buat ne’e sira fahe tiha ba rua (2) maibé ha’u ho ha’u nia konsellu foun ami lakhoi fahe,” José Leão afirma tan.

Prezidente APORTIL,I.P ne’e afirma sira tau item ne’e ida de’it ba loos kompañai ida atende servisu ida ne’e  mak total iha ne’e, iha dadus  item primeiru ba iha manutensaun nian Grand Total of scope of works for Shipyard (A) $359,370.00, iha fali segundu Grand Total of scope of work for Outsources (B) $360,712.40, husi rua ne’e mak  tau hamutuk US$720,082.40 seidauk inklui  kustu sira seluk tama tan ne’e mak nia total ba $786,000.00.

Kompaña PT. Dewa Ruci Agung mak manan na’in ba projetu manutensaun Ró Berlin Nakroma, maibe kompaña PT. Dewa Ruci Agung ba asina  akordu fali ho kompaña lokal  Trivia  hanesan sira-nia parseiru no sira-nia reprezentativu iha Timor-Leste.

Jornalista:Marcelino Tomae