Hatutan.com, (02 Outubru 2025), Díli- Emprezariu Timoroan, Raul Lemos ho nia espoza Krisdayanti ka koñesidu ho naran estimada KD, Kinta (02/10/2025), sai oradór prinsipál iha talkshow  ka konversa amigável iha Institute of Business (IOB).

Lee Mós: Raul Lemos-Krisdayanti Promove Turizmu Timor-Leste Liu Husi Múzika

Raul-KD ho família foto hamutuk ho dosente no estudante sira husi IOB hafoin partisipa talkshow amigavél, Kinta (02/10/2025). Foto/Juvinal Cabral dos Santos

Atividade akademiku ne’ebé akompaña mós husi Amora Lemos ho Kellen Alexander Lemos, oan doben husi kaben na’in selebridade ne’e hetan entosizmu husi estudante no korpu dosente sira iha institute refere.  

Krisdayanti (KD) ho Raul Lemos  halo juramentu ba sira-nia kazamentu loron 20 fulan-Marsu tinan 2011, iha Jakarta. Kaben-na’in ne’e iha oan na’in-rua, Amora no Kellen. Maski hetan susar ho boatus no relasaun distánsia dook tanba Raul nia serbisu iha Timor-Leste no KD nia ajenda okupadu nu’udar iha Indonézia nian, sira nia kazamentu metin nafatin.

Krisdayanti ho Raul Lemos nia kazamentu konsidera hanesan ezemplu ida hosi armonia família modernu, tanba sira mantein relasaun di’ak ho sira nia eis-la’en, eis-fen no oan sira.

Iha hahú talkshow nian diva pop  Indonézia Krisdayanti kolabora mós ho estudante no Dosente sira IOB hananu  múzika “Mai ita hamutuk”. Nune’e mós oan doben Amora Lemos kanta múzika Portugés ida ho titulu “Não Precisa ” (la presiza) ne’ebé kanta hamutuk mós ho partisipante sira ne’ebé prezenta iha  talkshow ne’e.

Ba joven no estudante sira iha IOB,  Krisdayant hateten loos duni, feto sira agresivu liu, femininu liu, bele dehan multitarefa, sira bele halo buat barak simultaneamente no husi ida-ne’e  iha konfiansa katak feto bele realiza buat barak.

“Tenke serbisu, labele baruk-teen. Tanba ne’e maka ha’u hatene katak ha’u nia la’en, husi nia adolexénsia, aprende ona atu halo komérsiu. Husi nia, ha’u mós aprende sentidu serbisu maka’as, maske ha’u iha ona independénsia iha ha’u-nia serbisu. Maibé nia bele tun ba merkadu, nia hanorin ema ne’ebé fa’an ikan atu aprende oinsá tesi ikan ho loloos. Di’ak, katak tesi ikan ho laloos bele hamenus ikan nia morin. Iha buat barak ne’ebé ha’u aprende tanba ha’u la hatene tein,” Krisdayanti hateten.

Krisdayanti haktuir iha nia arte sira durante dékada tolu liubá, liu tinan 30, no ida-ne’e konserteza sai hanesan viajen ida ne’ebé naruk no dezafiante. Iha ona provasaun no obstákulu barak.

Família Raul-KD partisipa iha talkshow ne’ebé organiza husi IOB.

“Maibé hanesan ha’u temi ona antes, ha’u serbisu maka’as, dedikadu, no dixiplina hodi kumpre tempu. Entaun, se dosente to’o iha tuku 7:00 dadeer hotu-hotu tenke iha klase iha tuku 7:15. Hodi prepara ita-nia an, ita prontu atu aprende, ita prontu atu simu koñesimentu, no ita prontu atu implementa ida-ne’e. Nu’udar feto, ha’u fiar katak ita bele luta liu fali funu ida. Sai kriativu iha arte no responsavel iha polítika konserteza la’ós imposivel, enkuantu ida-ne’e maneja no hala’o ho kompromisu no ekilíbriu”.

KD subliña no husu feto sira labele ta’uk atu kaer pozisaun lideransa nian no sai vizivel liu iha espasu públiku sira. Tanba nia fiar katak hodi halo nune’e, nia  bele hato’o katak feto nia influénsia tenke uza atu lori mudansa pozitivu.

“Ha’u fiar katak lideransa la’ós determina hosi jéneru, maibé determina hosi abilidade, integridade, no graduadu nia intensaun atu serbí. Ha’u espera katak kolega estudante sira mós sei iha korajen atu hakat ba oin no dezenvolve sira-nia potensiál no sai ajente ba mudansa iha ne’ebé de’it ita-boot sira iha,” KD hateten.

Nia  enkoraja estudante  sira iha Timor-Leste ne’ebé pursentu 60 mak feto, sei la dúvida no fiar katak feto sira ne’ebé serbisu nu’udar parte ida ne’ebé labele haketak husi edukuasaun.

“Katak ita trata ita-nia la’en sira hanesan parseiru. Ita bele hala’o papél ida no enkoraja ha’u atu estuda, masei ha’u foin hetan oportunidade atu hala’o ha’u nia estudu lisensiatura. Tanba bainhira ha’u sei ki’ik, ha’u okupadu liu ho serbisu, entaun ha’u gosta liu atu manán osan. Maibé tanba ha’u fiar katak edukasaun hanesan liña moris ida ne’ebé nunka hotu, nunka mate. Entaun mai ita foti valór pozitivu ida ohin dadeer. Katak ha’u sei ba kontinua  ho tinan 50, no ha’u hatene katak imi hotu sei joven tebes. Mai ita kompete hodi buka ita nia mehi. Enkuantu ita-boot sira sei joven, iha ita-boot nia adolexénsia no tinan 20. Halo buat barak. Esplora ita-boot nia abilidade sira. Buka tuir ita-boot nia mehi sira. Halo buat barak. Tanba bainhira ita-boot sai boot ona, bainhira ita-boot tenke bele relaxa liután, ita-boot sei arrepende. Entaun, hasa’e Ita-boot nia mehi sira.”

Biban ne’e, Raul Lemos mós fó hanoin katak iha moris ne’e nunka bele hakiduk  tenke iha prinsipiu katak “nia bele, nusa ha’u labele?” Tanba ne’e joven sira aproveita oportunidade didiak, ransu ho atividade pozitivu hodi evita ransu ne’ebé halo ema lanu ho tua loro-loron.

Raul-KD partisipa iha talkshow iha IOB.

“Iha moris ne’e ita nunka bele hakiduk, kuandu ita hakiduk ema seluk lao uluk ona ita ka  ita hamriik pasu ida ema seluk pasu ida. Tanba agora ne’e ema hotu hanoin hakarak buka atu susesu, buka nia aan susesu. Tanba ne’e mak ita iha difikuldade ita avansa nafatin iha mundu negosiu, monu hamriik ne’e normal”, Raul Lemos hateten.

Emprezáriu Timoroan ne’e esplika, ema ida iha nia prinsipiu rasik bainhira monu ona iha susesu ida, buka mañeira hamriik fali, labele fiar ema barak nia liafuan iha kakutak sai moras.

“Ha’u hatene negosiu iha eskola pre-SMP, hahu husi buat ki’ik ne’e mos tanba ransu, tanba ne’e mak ita ransu ida ne’ebé di’ak, labele ransu hemu loro-loron ou ita ba konta historia ne’ebé la hun la dikin, ita tenke ransu ema ne’ebé matenek liu ita para ita bele aprende husi nia”.

Iha fatin hanesan estudante Vianezia Vianei Pereira, Fakuldade  Ekonomia Negosiu  haktuir, nia orgullu hetan oportunidade bele hasoru malu ho Diva pop Indonézia Krisdayanti no bele hetan motivasaun furak kona-bá múzika.

“Ohin ha’u preukupa nune’e koloka pergunta kona-ba, oinsa ami joven sira hanesan ha’u ne’ebé mak iha talentu kona-bá múzika falta barak iha kompetisaun, husi ne’e oinsá motivasaun mai ami atu mantein espiritu atu atinji iha ami nia mehi,” Vianezia Vianei Pereira hateten.

Tuir estudante ne’e katak resposta ne’ebé furak husi Krisdayanti katak nia mós tuir kompetisaun maibe nafatin iha espiritu kompetitivu iha espasu publiku no importante hatudu disiplina ne’ebé di’ak hodi atinji mehi.

Raul-KD foto hamutku ho reitór IOB Pedro Ximenes.

“Ita bele fokus nafatin importante mak iha étika no Espiritu  badinas iha talenta sira ne’ebé ita halo hodi realiza ita nia mehi sira.”

Vise-Reitor I asuntu Akademiku IOB,  Vasio Sarmento Soares, hateten,  iha oportunidade ida ne’e IOB hakarak konvida figura sira ne’ebé mai husi emprezáriu no figura artista hodi mai partilla sira nia esperensia no valor vida moris ne’ebé sira kaer iha sira nia kareira ida-idak nian ba estudante no Dosente sira.

“Lisaun sira ne’e hanesan motivasaun ida ba Dosente no estudante sira hotu, ita forma Talkshow ne’ebé ita forma ho diskusaun mais informal hodi nune’e, lori ita nia estudante sira hakbesik ba iha ita nia figura nain rua ne’e,” Vasio Sarmento Soares hateten.

“Notas ne’ebé ohin ha’u konsege akapta hato’o husi figura nain rua ne’e mak, husi maun Raul-Lemos mak  tenkeser respeita tempu liu-liu joven Timor-oan, ema seluk bele tanba saida mak ita labele.  Nune’e mos husi Mana Krisdayanti husu ba alin feto sira estudante IOB, hodi bele feto iha forsa no mentalidade hodi duni sira nia mehi iha vida akademiku no kareira professional sira seluk”.

Jornalista: Juvinal Cabral dos Santos