Hatutan.com, (04 Novembru 2025), Díli– Opersaun Konjunta FALINTIL-Forsa Defeza Timor-Leste  (F-FDTL) ho Polísia Nasionál Timor-Leste (PNTL) asegura kazu ualu (8) durante loron matebian ka finadu iha Munisípiu Díli.

Komandante Polísia Nasional Timor-Leste (PNTL) Munisípiu Díli, Superintendente Xefe Polísia, Orlando Gomes. Foto/Juvinal Cabral dos Santos

“Komandu Munisípiu Díli hakarak atualiza kazu sira ne’ebé akontese iha loron 01-02 fulan-Novembru tinan 2025, loron matebian nian, ita iha kazu balun parte Kristu Rei kazu ofensas integradu fiziku simples ida, violensia domestika ida, nune’e mós iha Dom Aleixo violénsia domestika iha tolu, akontese insendiu ida ahi han uma iha Lurumata no ita-nia korpu  Bombeiru konsege halo prevensaun hamate tiha, iha Nain-Feto mak kazu estraga sasan ida tanba lanu iha área Taibessi nian, Vera Kruz iha kazu maus tratus ba minoridade ida,  nomos kazu ofensas integradu fiziku ida,”  Komandante Polísia Nasional Timor-Leste (PNTL) Munisípiu Díli, Superintendente Xefe Polísia, Orlando Gomes ba jornalista sira iha eskuadra Dom  Aleixo, Tersa (04/11/ 2025).

Depois iha Metinaro grupu balun mak lanu ekipa konjunta halo prevensaun tiha tanba ne’e total kazu ba ofensas integradu fiziku simples iha rua, kazu Violensia domestika iha haat insendiu ida, no estraga sasan ida total hamutuk walu mak akontese iha loron finadu 01-02 fulan Novembru tinan 2025.

“Durante finadu loron matebian ninian hanesan  planu ne’ebé mak komandu munisipiu Díli trasa destaka membru sira iha semiteriu hotu-hotu konsege ita halo prevensaun situasaun seguransa iha kapitál Díli, iha mos grupu balun tenta atu konsumu alkohol iha semiteriu iha halo prevensaun,” nia informa.

Nia dehan, iha mós asidente tráfiku motór soke karreta iha área Pantai Kelapa ne’e mós iha ona atendementu husi tranzitu sira, nune’e kazu sira ne’ebé akontese investigasaun eskuadra sira halo prosesu investigasaun hodi aprezenta ba iha Ministériu Públiku (MP), geralmente situasaun iha loron finadu la’o hakmatek tebes.

“Hanesan kazu Violensia domestika ne’e  prosesu ba iha seksaun Vulneravel Polísia Unit (VPU), kazu krimi Públiku ne’e ita aprezenta ba iha Ministériu Públiku (MP), no mos kazu ofensas integradu fiziku simples ne’e kazu sira akontese normal bai-bain, nia la iha ligasaun ho loron finadu ninian, durante loron rua dia 01-02 Novembru  ita la detein detidu ruma mai iha sela detensaun.”

Komandu PNTL Munisípiu Díli husu nafatin ba sidadaun sira atu prepara an ba  loron boot tuir mai 12 Novembru 2025, Natal no  tinan foun nian, mantein  kumpre orden,  karik hemu tua kontrola an, labele perturba orden públika kontribui ho autoridade seguransa.

Jornalista: Juvinal Cabral dos Santos