Hatutan.com, (02 Dezembru 2025), Díli—Diretór Ezekutivu kompañia Bobolait Group.Lda, Carlito M. S. Pereira, klarifika katak, kontrusaun bá  menumentu memoriál  Masakre Santa Krús, 12 Novembru  1991 paradu tanba iha  interese polítika entre Ministériu Asuntu Kombatente Libertasaun Nasionál (MACLN, sigla portugés) ho  Komité 12 Novembru (C12N).

Lee Mós: Bobolait “Rende” Ezekuta Projetu Konstrusaun Monumentu Memoriál 12 Novembru no Entrega Fali Ona Ba MCLAN

Projetu Monumentu Mermoriál Masakre Santa Krús ne’ebé la hatudu progresu. Foto/Dok

Diretór Ezekutivu  Bobolait Group.Lda, Carlito M.S . Pereira bá Hatutan.com iha nia rejidénsia Kulu-Hun, Díli, Tersa (02/12/2025),  hateten Bobolait  Gruop la  rende bá konstrusaun  monumentu memoriál Masakre Santa Krús  tanba  kontratu  sei moris to’o iha  fulan-Jullu 2026.

“Agora ko’alia kona-bá projetu  konstrusaun monumentu memoriál   ne’e husi MACLN ho C12N sira maka na’in, ne’ebé projetu ida-ne’e maka iha intesese polítika uitoan iha laran,” Carlito M. S. Pereira hateten.

Nia hatutan, empreza  Bobolait nia dokumentu iha ne’ebá hela, hatama dokumentu  atu halo aprovasaun iha fulan-Setembru, tinan kotuk, mas to’o agora, kontratu ne’e sei moris hela, tanba kada  tinan, ne’e kontratu ne’e renova to’o tinan oin.

Nia afirma, kona-bá gastu ne’e, projetu na’in maka hantene, tanba kompañia Bobolait ne’e halo servisu bazeia bá orden  husi konsultan.

“Komisaun Anti-Korrupsaun (CAC,sigla portugés) la hatene prosesu projetu ne’e, tanba CAC la’ós na’in bá projetu, CAC  só hatene halo investigasaun, se CAC  dehan kontratu mate, sira hatene informasaun husi ne’ebé,” Carlito Pereira  diskorda.

Nia afirma, konstrusaun ne’e, seidauk la’o tanba estatua atu  halo fali iha Portugál, maibé kustu boot liu, nune’e maka dada to’o ohin loron.

Nia subliña, empreza Bobolait   hato’o pedidu atu halo mudansa bá projetu ne’e ate adata,  tanba  estatua ne’e  empreza Bobolaid maka atu halo duni,  maibé ate agora projetu na’in sira seidauk deside ne’e. 

“Uluk kontratu  orijinál ne’e atu atu halo estatua, to’o ikus sira deside fali atu halo iha Portugál, maibé atu halo iha ne’ebá tenke presu di’ak, maibé  kustu bá atu halo Portugál ne’e boot liu fali kontratu ne’e,” nia hateten.

Nia dehan, projetu ne’e  halo  empreza Bobolait atu mate, tanba projetu ne’e dezde 2021 ate agora atu tama tan tinan 2026, maibé seidauk atinji 50%.

Konstrusaun ba projetu monumentu memoriál 12 Novembru 1991 hahú iha loron 22 fulan-Setembru 2021, atu finaliza iha fulan-Setembru 2022, maibé seidauk konklui no orsamentu ne’ebé alokla bá projetu ne’e hamutuk $1.385.389.88.

Kona-bá tenderizaun foun bá monumentu memoriál, Carlito, afrima katak, empreza Bobolait kumpre de’it  pakote ne’ebé iha ona.

Na’in bá empreza Bobolait, mós sente duvida,  ho projetu ne’e, tanba C12N ho maka MACLN  hafuhu malu, parte rua ne’e hein malu.

Nia dehan, tanba projetu ne’e agora iha hela Ajensia Dezenvolvimentu Nasionál (ADN) no Komisaun Aprovizionamentu Nasionál (CNA)  aprova nafatin empreza Bobolait maka  halo servisu, tanba dokumentu  Bobolait nian iha ona ADN nia liman

“Ami atu dada  aan mós la di’ak, di’ak liu ita bá nafatin de’it, maibé ami atu halo servisu tenke hein orden husi konsultan, hanesan ita-boot sira ohin mai atu entrevista ha’u ne’e, parese iha órden husi ita-boot nia xefe,” nia esplika.

Jornalista: Marcelino Tomae