Hatutan.com, (09 Janeiru 2026), Díli- Membru Parlamemtu Nasionál  husi Bankada FRETILIN, Antoninho Bianco, hateten kuandu projetu fornesimentu karreta bucket truck unidade tolu (3) ba Eletrisidade Timor-Leste, Empreza Públiku ne’ebé (EDTL,E.P) la tuir nia espesifikasaun ne’ebé kontempla iha fatura kuantidade ka BoQ (Bill of Quantity), ne’e kontra regra aprovizionamentu ka Rejime Jerál Aprovizionamentu.

Lee Mós: Deskonfia, Korrupsaun iha Fornesimentu Karreta Bucket Truck EDTL, E.P

Membru PN hosi Bankada FRETILIN, Antóninho Bianco. Foto/Dok

Membru Bankada FRETILIN fó nia hanoin katak  kazu  sira hanesan  ne’e barak mak akontese no projetu adjudikasaun direita mós barak loos, tanba ne’e prosesu hanesan ne’e Komisaun Anti-Korrupsaun  (CAC siglá portugés)  tenke la’o depois ema sira iha laran mós tenke fó sai  para regra orienta la’ós podér mak orienta.

Regra orienta mak sistema aprovizionamentu ne’e la’o halo nusá, sé mak konkore sé mak manan, preinxe rekezitu,  kustu mós tenke razoavél tuir sasan nian folin no kualidade sasan nian.

“Klaru katak iha konkursu ne’e tenke sosa karreta  bucket truck ho marka Isuzu labele muda, sé muda ona, ne’e violasaun, tanba iha planu osan hanesan ne’e atu sosa karreta bucket truck nia modelu Isuzu, sé liu dook husi ne’e entaun labele bele dehan dezvia entaun ha’u hanoin ne’e prová ida  iha tuir loloos ne’e labele akontese,” Deputadu Antoninho informa ba jornalista sira iha PN, Sesta (09/01/2026).

Deputadu ne’e hatutuan tán katak, “sé sira lakohi halo tuir  kontratu ne’ebé mak iha ne’e, presiza halo  prosesu investigasaun kle’an, karreta tuir loos atu  sosa bucket truck ho marka Isuzu, maibé sosa fali seluk (Triton) ne’e regra laloos, tanba ne’e presiza prosesa ema sira hanesan ne’e, la presiza tolera hela de’it ema sira hanesan ne’e,” Deputadu Antoninho Bianco afirma.

Membru Parlamentu Nasionál ne’e apresia média Hatutan.com nia  servisu  no sujere bele ba husu informasaun ba iha donu obra ka kompañia ne’ebé mak manan projetu rereré para bele iha transparensia ba  informasaun.

“Labele ema ida taka informasaun sistema aprovisionamentu  ba públiku tanba ida-ne’e bele viola prinsipu transparante iha ezekusaun orsamentu jeral Estadu. Ha’u hanoin buat ida Estadu nian laiha ida segredu ne’ebé kualkér saida de’it laiha segredu, segredu ne’e só kestaun seguransa nasaun nian bele segredu, maibé kestaun aprovisionamentu sosa karreta ba instituisaun estadu ne’e laiha segredu para uza povu nian osan ne’e ho loos,” reprezentante povu iha uma fukun PN ne’e afirma tan.

Hanesan fó nanis ona katak dirijénte sira iha Eletrisidade Timor-Leste, Empreza Públiku (EDTL, E.P) to’o kontínua nonook no dezvia husi média Hatutan.com atu halo konfirmasaun loloos ba kazu  projetu fornesimentu karreta bucket truck  ne’ebé deskonfia hamosu korrupsaun no abuzu podér.

Projetu fornesimentu karreta bucket truck unidade tolu (3) ho kustu US$216,000.00 neʼebé manan husi empreza fornesidór Haksolok Group la konsege kumpre rekizu balun iha BoQ tanba karreta bucket truck ne’ebé kontempla iha kontratu ne’e karreta ho marka Isuzu, maibé Haksolok Group fonese fali karreta ho marka Triton.

La’ós ne’e deit, tuir avaliasaun tékniku sira-nian katak bucket truck ne’ebé hatuur ka rakit iha karreta triton ne’e la seguru bainhira funsionáriu ka pesoál traballadór sira utiliza ba servisu fatin aas ba manutensaun ai-riin eletrisidade nian, tesi ai-horis, inklui halo manutensaun ba liña distribuisaun eletrisidade nian iha área sira ne’ebé difisil.

Iha Segunda, 05 Janeiru 2026, Hatutaun.com tenta komfirma kestaun ne’e ho   Prezidente Konsellu Administrasaun EDTL, E.P, Paulo da Silva, ho  nia Komisáriu Ezekutivu Korporativu (KEK), Júlio de Jesus Gonçalves, maibé husi ofisiál media husi EDTL. E.P informa katak, dirjente na’in-rua seidauk tama servisu.

Iha loron tuir mai, Tersa (06/01/2026), hale’u tuku 08:30 dadeer, Hatutan.com nafatin hakat bá edifísiu EDTL.E.P hodi halo  konfirmasaun, maibé  razaun seluk tan husi ofisiál media  katak,  Prezidente Konsellu Administrasaun EDTL,E.P, Paulo da Silva, lisensa hela no sei tama servisu iha  loron,  08 fulan-Janeiru tinan 2026, tanba ne’e Komisáriu Ezekutivu Korporativu, Júlio de Jesus Gonçalves, la bele fó kometáriu, ho razaun katak  ténke hetan autórizasaun husi  Prezidente Konsellu Administrasaun EDTL,E.P.

Hatutan.com kontaktu Prezidente Konsellu Administrasaun  EDTL, E.P, Paulo da Silva liu-husi telefonika no manda mensajen  ba WatsApp 7850xxx, maibé númeiru ne’e la ativu.

 Iha Kuarta (07/01/2026), Hatutan.com kontínua halo komunika liu husi telefoni no mesajen, ba  Komisáriu Ezekutivu Korporativu (KEK) Eletrisidade Timor Leste Empreza Públika (EDTL, E.P), Júlio de Jesus Gonçalves, informa fali  katak okupadu ho hela ekontru.

“Ami enkontru hela, presiza karik mesajen mai,” Júlio de Jesus Gonçalves infroma liu husi mensajen.

Iha Kinta, (08/01/2026), Hatutan.com hasoru malu ho Prezidente Konsellu Administrasaun EDTL,E.P, Paulo da Silva ho nia  Komisáriu Ezekutivu Korporativu, Júlio de Jesus Gonçalves, hafoin enkontru ho Ministru Obras Públika (MOP), Samuel Marçal, maibé  parte rua seidauk bele ko’ali tanba iha enkontru  urjente ida fali iha EDTL,E.P.

Nune’e Hatutan.com kontinua tuir mai to’o iha Edifisíu EDTL,E.P hodi halo aprosimasaun atu bele iha dispnibilidade tempu entrevista konfirmasaun ho   Prezidente Konsellu Administrasaun EDTL,E.P, Paulo da Silva no nia  Komisáriu Ezekutivu Korporativu, Júlio de Jesus Gonçalves, maibé kontínua hateten la iha tempu tanba okupadu ho servisu.

Iha soirn seluk mós Hatutan.com  mós tenta halo konfirmasaun dala rua bá  Diretóra Ezekutiva Empreza Haksolok Group, Domingas Maria Fátima Ximenes, maibé funsionáriu balun neʼebé servisu iha empreza Haksolok Group informa katak Diretóra Ezekutiva seidauk fila husi rai li’ur.

Jornalista: Zita Menezes