Hatutan.com, (27 Fevereiru 2026), Díli– Aviaun komersiál ho Bandeira Timor-Leste, Aero Dili loke tan rota  foun rua, ba Kuala Lumpur-Malázia no Darwin-Austrália.

Lee Mós: Bá Dahuluk, Aero Dili Transporta PM Xanana ho Delegasaun Halo Viajen Ofisiál Bá Malázia Partisipa Simeira ASEAN

Na’in ba Aero Dili, Lourenço de Oliveira akompaña husi Diretora Jerál Aero Dili, Maria Angela Oliveira hala’o konferénsia imprensa iha Otél Timor, Sesta (27/02/2026). Foto/Zita Menezes

Rota foun ba Kuala Lumpur-Malázia sei hahú inaugural  voo iha loron 28 Masu  no halo mós inaugural voo ba Darwin-Austrália iha loron 24 Maiu 2026.

Na’in ba Aero Dili, Lourenço de Oliveira akompaña husi Diretora Jerál Aero Dili, Maria Angela Oliveira iha konferénsia imprensa iha Otél Timor, Sesta (27/02/2026), informa Aero Dili sei voo  ba Malázia semana ida  dala-rua loron Tersa ho Sabadu, horáriu Aero Díli, ho oráriu sai husi Dili tuku 08:oo dadeer no fila husi Malázia tuku 12:00 Otl.

Oráriu  voo ba Darwin-Austrália, semana ida dala-rua; iha Tersa ho  Domingu, ho oráriu sai husi Timor-Leste iha tuku 02:00 Otl no fila husi Darwin mai Timor-Leste tuku 04:00 loraik Otl.

Lourenço de Oliveira esplika iha Domingu,  aviaun Aero Díli voo ba Darwin-Austrália iha tuku 08:00 dadeer Otl depois fila-fali mai tuku 9:45 Otl, nune’e aviaun  Aero Dili sei liubá  fali iha Bali-Denpasar hodi bele tula fali pasajeiru sira ne’ebé mak atu  transit fali ba  Dempassar.

Nia afirma kona-bá folin tikete aviaun Aero Díli voo ba Kuala Lumpur-Malázia no Darwin-Austrália balansu hanesan mós ho  aviaun seluk ne’ebé halo voo ba nasaun rua ne’e rasik.

“Sé ema seluk mai fa’an hanesan ne’e, ita mós tenke faan hanesan,” Lourenço de Oliveira informa.

Nia afirma daudaun ne’e aviaun Aero Díli rua, Aibus A319 no A320  no ida seidauk semo to’o  oras 300 tuir padraun internasionál aviaun nian, tanba tuir loloos aviaun  ida tenke voo ho oras 300  tanba ne’e hakarak ka lakohi tenke aumenta tán oras semo nian.

Na’in ba Aero Dili, Lourenço de Oliveira hatutan katak  nia parte sei haree ba kondisaun ekonomia no merkadu iha Timor-Leste, karik iha nesesidade nia sei aumenta tán aviaun Aero Díli iha Timor-Leste.

“Ita haree took sé karik ita nia merkadu ne’e di’ak, ita tenke aumenta tán aviaun ida tinan ida-ne’e ka tinan oin, aumenta ida tanba ita sei semo ba Tailándia no semo tán ba Filipina,”nia hateten.

“Maromak tulun, sé ita sorte,  iha  tinan 2030, ha’u iha programa Aero Dili bele  semo ba Europa,” Lurenço hateten.

Daudaun ne’e aviaun Aero Dili A319 ho A320 halo operasaun regular Dili-Denpasar ba-mai, Dili-Singapura no Dili-Xina ba-mai.  

Jornalista: Zita Menezes